ახალციხეში აბიტურიენტები გამოცდაზე ერთმანეთისგან იწერდნენ

საზოგადოება - 12:57, 11 Jul, 2018

2906

ახალციხეში ეროვნული გამოცდებიდან გამოსული აბიტურიენტები ამბობენ, რომ გამოცდაზე ერთმანეთისგან იწერდნენ და ამ ფაქტს დეტალურად ჰყვებიან. ინფორმაციას "სამხრეთის კარიბჭე" ავრცელებს.

„შენს ზურგს უკან ვინც ზის, იმას ჩვეუელბრივად შეუძლია, რომ გადაიწეროს. ამისთვის ფურცელი გავუწიე მაგიდის კუთხეში ისე, რომ მას დანახვა შეძლებოდა. მერე დამკვირვებელი რომ მოდის ფურცელს მაგიდის შუაში გიწევს, მაგრამ უკან მჯდომი დანახვას ასწრებს და პასუხებს იწერს. გარდა ამისა, კიდევ ეკრანზე ვადებთ თითს მაგალითად „ბ“–ს, ან „გ“–ს, მოკლედ რომელიც სწორი პასუხია, ის ხვდება და თვითნაც სწორ პასუხს უთითებს“, – გვიყვება ერთ–ერთი აბიტურიენტი.

მისი თქმით, დამკვირვებელმა შენიშნა, რომ იგი სხვას პასუხებს აწერინებდა, ამიტომ ტესტზე, რომელსაც წერდა, ფურცელი დააფარებინეს: „იმას კიდევ ვისაც ვაწერინებდი შენიშვნა მისცეს“.

საგამოცდო ცენტრიდან გამოსული აბიტურიენტები ამბობენ, რომ გადაწერის შანსი ყველა მათგანს ჰქონდა.

„მე მაგალითად, გამოცდის დაწყებამდე გვერდით მჯდომს შევუთანხმდი, რომ სამუშაო ფურცელზე პასუხები დიდი ასოებით ეწერა, ეგრე გადავიწერე ინგლისურში მთელი მოსასმენი“, – ამბობს კიდევ ერთი აბიტურიენტი.

მასთან ერთად საგამოცდო ცენტრიდან გამოსული სხვა აბიტურიენტიც გვიყვება, რომ იმ სექტორში, რომელშიც ის აბარებდა გამოცდას, პასუხებს ყველა წინ მჯდომისგან იწერდა: „ისეთი სიტუაცია იყო, რომ ყველა პირველი ბავშვისგან ვიწერდით, წინ იწეოდნენ ოდნავ კისერს ღრიცავდნენ და იჭყიტებოდნენ. მთავარია „გ“, „ბ“, „დ“ დაგენახა და ეგ იყო, უცებ გადიოდი ბოლოში“.

ახალციხის საგამოცდო ცენტრის ხელმძღვანელი გელა ინასარიძე გადაწერის ფაქტებს უარყოფს, - „თითო სექტორში ორი მეთვალყურეა და შეუძლებელია გადაწერის საშუალება ჰქონოდათ. ასევე, კამერა უყურებს და ჩვენც ვაკონტროლებთ“.

ახალციხის საგამოცდო ცენტრის მონაცემებით დღეს, გერმანულ ენაში, პირველ სესიაზე რეგისტრირებული 4 აპლიკანტიდან ოთხივე გამოცხადდა, ხოლო ინგლისურ ენაში 222 აბიტურიენტიდან – 5 არ მივიდა.

მეორე სესიაზე კი ფრანგულ ენაში რეგისტრირებული 2 აპლიკანტიდან ერთი არ გამოცხადდა, ხოლო ინგლისურ ენაში 222 აბიტურიენტიდან – 5.