"შეტევა" ფიფას ფეისბუკგვერდზე - "დიდება უკრაინისთვის" დასჯილი ხორვატი ფეხბურთელების მხარდასაჭერად

სოც.მედია - 10:46, 10 Jul, 2018

2615

ხორვატიის საფეხბურთო ნაკრების სამწვრთნელო შტაბის წევრის ოგნენა ვუკოევიჩის და ნაკრების ფეხბურთელის დომაგოი ვიდას მიერ რუსეთის დამარცხების შემდეგ ჩაწერილი ვიდეო კვლავ სკანდალის მიზეზია.

ამ ვიდეოს გამო, ხორვატიის საფეხბურთო კავშირმა მსოფლიო ჩემპიონატზე სამწვრთნელო შტაბის წევრი, ოგნენა ვუკოევიჩი გაათავისუფლა. ვუკოევიჩს ჩამოართვეს ტურნირის აკრედიტაცია და ხორვატიის დელეგაციის შემადგენლობაში აღარ არის. საფეხბურთო კავშირმა ვუკოევიჩის განცხადებაც გაავრცელა.

"ჩემს სიტყვებში არავითარი პოლიტიკური ფონი არ ყოფილა. თუმცა მესმის, რომ ჩემი განცხადების, სამწუხაროდ, სხვანაირად ინტერპრეტირება შეიძლებოდა. ამის გამო ვწუხვარ და ბოდიშს ვუხდი რუს გულშემატკივარს." - ნათქვამია განცხადებაში.

ცნობილი გახდა ისიც, რომ ამ ვიდეოს გამო ფიფამ დომაგოი ვიდას დისციპლინარული გაფრთხილება მისცა. ხორვატიის მცველმა ბოდიში მოიხადა და განაცხადა, რომ მისი სიტყვები ინტერპრეტირების მსხვერპლი გახდა.

„დიდება უკრაინას“ გამო, ვუკოევიჩისა და ვიდას წინააღმდეგ გატარებულმა ღონისძიებებმა, საფუძველი ჩაუყარა ფლეშმობს, რომელიც მიზნად ფეხბურთელების მხარდაჭერას ისახავს.

9 ივნისს ასეულობით ფეისბუკმომხმარებელმა ფიფას ფეისბუკგვერდზე ფეხბურთელების მხარდამჭერი შეტყობინებები გაავრცელეს. უმრავლესობა შეტყობინებისა იყო Слава Україні! სხვადახვა ენაზე.

ამასთანავე ფეისბუკმომხმარებლები ფიფას შეფასებებში ერთ ვარსკვლავს უთითებდნენ.

ამ დროისთვის ფიფას ფეისბუკგვერდს 152 ათასი 1 ვარსკვლავი აქვს.