"რატომ არაფერმა შეაჩერა, არც უარმა, არც ქმარმა, არც 4 წლის ბავშვის ტირილმა?" - რას წერენ ხადას ხეობაში მომხდარ მკვლელობაზე

სოც.მედია - 13:13, 09 Jul, 2018

19472

სოციალურ ქსელში ხადას ხეობაში მომხდარ მკვლელობას ევანგელისტურ-ბაპტისტური ეკლესიის ეპისკოპოსი რუსუდან გოცირიძე ეხმაურება.

“ერთი ჩემი ბავშვობის მეგობარი გვიყვებოდა თავისი ემიგრანტული ცხოვრების გამოცდილებებს დიდი ხნის უნახავ ახლობლებს. ერთი ძალიან მნიშვნელოვანი დაკვირვება გაგვიზიარა თავისი მრავალწლიანი ევროპული ცხოვრებიდან - თურმე ევროპელი ქალები თავისი ქმრების კი არა და შეიძლება ბოიფრენდის ერთგულებიც კი იყვნენ... არ ვაჭარბებ. ეს ისეთი აღმოჩენა იყო მისთვის, როგორც ახალი მიწის დანახვა მაგელანისთვის.

ვისაც გგონიათ, რომ ევროპის გარყვნილებაზე საუბარი (გინდა მედიით, გინდა სადღეგრძელოებით და გინდაც ამბიონიდან) არის უწყინარი "საკუთარი აზრის გამოთქმა", მაშინ ამიხსენით 19 წლის მწყემსი ბიჭი რამ გააშლეგა და გადარია? რატომ არაფერმა შეაჩერა, არც უარმა, არც ქმარმა, არც 4 წლის ბავშვის ტირილმა?

ტურისტები აქ აღარ ჩამოვლენ კი არა და, ჩვენს საკუთარ შვილებს მკვლელებად და მოძალადეებად ისე ვზრდით, ოდნავადაც არ ვუფიქრდებით რას ჩავდივართ.

ვისაც ეს ნათქვამი გადაჭარბებულად მოგეჩვენოთ, დაივიწყეთ და ატარეთ ჩოხებით და ჭინჭრებით თქვენი პატარები მიტინგებზე...” - წერს გოცირიძე.