თბილისის საერთშორისო აეროპორტში რამდენიმე დღის წინ ინციდენტი მოხდა - არსებული ინფორმაციით უცნობმა პირმა, აეროპორტის ტერიტორიაზე მდებარე ერთ-ერთ ოთახში მხუთავი აირის სპეც-აღჭურვილობა შეაგდეს.

ასევე ვრცელდება ინფორმაცია იმის შესახებ, რომ შემთხვევის შედეგად რამდენიმე ადამიანი მოიწამლა.

"ნიუპოსტი" ინფორმაციის მისაღებად და გადასამოწმებლად შინაგან საქმეთა სამინისტროსა და სახელმწიფო უსაფრთხოების სამსახურს დაუკავშირდა, სადაც განაცხადეს, რომ მიმდინარეობს ფაქტის გადამოწმება. "ნიუპოსტი" დეტალების გარკვევას ცდილობს.

თბილისის აეროპორტის პრესსამსახურში "ნიუპოსტს" განუცხადეს, რომ მომხდარს კვალიფიკაციას ვერ მისცემენ:

"მომხდარს კვალიფიკაციას მე ვერ მივცემ, უმჯობესია ამ საკითხთან დაკავშრებით შინაგან საქმეთა სამინისტროს მიმართოთ", - აცხადებენ პრესსამსახურში.

რაც შეეხება კითხვას თუ რა ნივთიერება იქნა გამოყენებული აეროპორტში, პრესსამსახურის წარმომადგენელმა განგვიცხადა, რომ ეს არ იყო მხუთავი აირი, თუმცა დამატებითი კომენტარის გაკეთებისგან თავი შეიკავა და არც სავარაუდო დაშავებულებზე ისაუბრა.

ინფორმაცია თავდაპირველად droni.ge-მ გაავრცელა. საინფორმაციო სააგენტოს ცნობით ამოღებულია ვიდეო ჩანაწერები, სადაც სავარაუდო დამნაშავე ჩანს.