ბესელიას გვერდით დგომა არ იყო სირცხვილი და სააკაშვილის პარტია "გეგრეხებათ"?

ბესელიას გვერდით დგომა არ იყო სირცხვილი და სააკაშვილის პარტია "გეგრეხებათ"? - ნიკა გვარამია

სოც.მედია - 12:14, 19 Jun, 2018

1898

რუსთავი2-ის გენერალური დირექტორი, სოციალურ ქსელში, შვილ მოკლული მშობლების გვერდით არასამთავრობო ორგანიზაციების პასიურობას აკრიტიკებს.

"მითქვამს და გავიმეორებ, ამ ქვეყნის ყველაზე ჯანსაღ და ხარისხიან ძალად არასამთავრობო სექტორი მიმაჩნია. მაგრამ, მეორეც მითქვამს და იმასაც გავიმეორებ - ძალიან სერიოზული პრობლემაა, რომ ოპოზიციის, განსაკუთრებით, ენმ შიშით თუ ზიზღით თუ სიძულვილით რომ არ არიან ჩაბმული აქციებში მაჩალიკაშვილის და სარალიძის დასაცავად.

დიდი ბოდიში და პლინტუსს ქვემოთ ოპოზიციასთან (მათ შორის, პრორუსულთან) იყავით გაერთიანებული ვაზაგაშვილის და გირგვლიანის საქმეებზე და პოლიტიკურ მესიჯებს ახმოვანებდით, მათ შორის, ანტისამთავრობოს. და ბესელიასთან გვერდით დგომა არ იყო სირცხვილი და სააკაშვილის და ნათელაშვილის პარტიები "გეგრეხებათ"? რუსეთიდან მოგზავნილი ივანიშვილის გვერდით ყოფნა არ იყო რეპუტაციისთვის დამაზიანებელი და პროდასავლური ოპოზიციის მხარდაჭერაა?

იცით, რომ პატივს გცემთ და მხარს გიჭერთ ალბათ ყველაზე მეტად ამ ქვეყანაში, მაგრამ მძიმე შეცდომას უშვებთ, რომლითაც, საბოლოო ჯამში და სამწუხაროდ, ქვეყანას არათუ ვერ ეხმარებით, არამედ, კიდევ უფრო სამწუხაროდ, ვნებთ კიდეც, რამეთუ უნებლიედ უხანგრძლივებთ ქართული ოცნების ოლიგარქიულ, კლეპტოკრატიულ და უკვე კრიმინალურ რეჟიმს სიცოცხლეს.

მარტოკა თქვენი ძალისხმევით და პროცესების პოლიტიკური სტერილიზაციით, ერთი მეტრით წინ ვერ წაიწევს ამ ქვეყანაში დემოკრატია. გერევათ, მეგობრებო: თქვენ ხართ დემოკრატიის ვოჩდოგები და არა შემოქმედნი. დემოკრატიას პარტიები და ხალხი ამყარებენ ერთობლივად. მედია და არასამთავრობო სექტორი მხოლოდ სწორი მიმართულების მიმცემი მოდარაჯე ძაღლები არიან. და ახალი ძალის ლოდინით თავს ნუ დაიღლით, ამ ათწლეულში და მაღალი ალბათობით არც შემდეგში ეგ არ მოხდება და ნუ იქნებით გულუბრყვილოები და პოლიტიკის არმცოდნე უმწიფარები - ფუჭია ეგ მოლოდინი.

ასე რომ, გამონახეთ საკუთარ თავში რესურსი, დაივიწყეთ ძველი წყენები და დადექით იქ, სადაც ხალხის მაჯისცემაა. თორემ ძალიან დროს და რეალობას აცდენილია უკვე ეს გაურკვეველი შუაშისტურ-ნეიტრალურ-დაბალანსებულ-პოლიტკორექტული და საბოლოო ჯამში სრულიად არაფრის მთქმელი და არაფრის მომტანი პოზიცია. და ისიც გაითვალისწინეთ, რომ შუაშისტ-ნეიტრალებს არასდროს არაფრისთვის არ მიუღწევიათ ამ ქვეყანაში. არასდროს და არაფრისთვის. საქმე საქმეზე რომ მიდგება, ასე ისხდებიან კლავიატურებთან, თქვენს მოსაწონ სტატუსებს დაწერენ და არჩევნებზეც კი არ მივლენ, არათუ რამე უფრო სერიოზულს იზამენ." - წერს ნიკა გვარამია.