ხორავას ქუჩის საქმე - საგამოძიებო კომისიის თავმჯდომარე და უმრავლესობა "ევროპული საქართველოდან" იქნება

პოლიტიკა - 14:49, 04 Jun, 2018

3534

საპარლამენტო უმრავლესობისა და უმცირესობის შეხვედრაზე თბილისში, ხორავას ქუჩაზე მოკლული მოზარდების საქმის შემსწავლელი დროებითი საგამოძიებო კომისიის შექმნაზე იმსჯელეს.

პარლამენტის თავმჯდომარის ირაკლი კობახიძის განცხადებით, კომისიაში უმრავლესობა „ევროპულ საქართველოს“ ექნება და კომისიის თავმჯდომარეც საპარლამენტო უმცირესობიდან შეირჩევა. დარჩენილი 8 ადგილი მმართველ გუნდთან და "პატრიოტთა ალიანსზე" გადანაწილდება

„ჩვენ გვქონდა შეხვედრა საპარლამენტო უმცირესობის ლიდერებთან დროებით საგამოძიებო კომისიასთან დაკავშირებით და შევთანხმდით შემდეგზე რომ - საპარლამენტო უმცირესობა იქნება კომისიაში წარმოდგენილი უმრავლესობით ანუ 9 წევრი ეყოლება საპარლამენტო უმცირესობას და ეს მოხდება კვოტების გადანაწილების ხარჯზე და შესაბამისად, უმცირესობის წარმომადგენელი იქნება დროებითი საგამოძიებო კომისიის თავმჯდომარეც, ეს არის ჩვენი კონსულტაციების შედეგი,“ - განაცხადა კობახიძემ.

პარლამენტის თავმჯდომარის თქმით, საგამოძიებო კომისია სავარაუდოდ, შეიქმნება ოპოზიციური პარტიის, „ენმ-ის“ გარეშე. ირაკლი კობახიძის განცხადებით, „ენმ-მ“ საგამოძიებო კომისიაში ჩართვასთან დაკავშირებით უარი განაცხადა.

ირაკლი კობახიძის თქმით, რიგგარეშე სხდომა, სავარაუდოდ ორ დღეში გაიმართება.