"ვითხოვთ იმ ხელფასს რაც იყო 2013 წელს" - მეტროს მემანქანეები კალაძეს სიცრუეში ამხელენ

პოლიტიკა - 11:00, 04 Jun, 2018

3694

დედაქალაქის მერის განცხადებას იმასთან დაკავშირებით, რომ მეტროს თანამშრომლები გაფიცვით მოქალაქეებს აშანტაჟებენ, მეტროს მემანქანეები პასუხობენ. მათი თქმით, თბილისის მერი მოქალაქეთა შეცდომაში შეყვანას ცდილობს და აცხადებენ, რომ მემანქანის ხელფასი არა 1800 ლარს, არამედ 1200 ლარს შეადგენს.

"ჩვენ არ ვსაუბრობთ შანტაჟის ენით, ჩვენ ყოველ წუთს და ყოველ წამს მზად ვართ დავჯდეთ მოლაპარაკების მაგიდასთან და დათმობაზეც წავიდეთ. არ ვცდილობთ საზოგადოებისთვის პრობლემების შექმნა, ყოველთვის ვითხოვდით, რომ ხელფასიდან დანამატის თანხა გამონახული ყოფილიყო შეეზღუდათ თავისთვის დანამატები პრემიები და იმ თანხებიდან მომხდარიყო ხელფასის გაზრდა. ჩვენი ხელფასი თურმე ყოფილა 1400 დან 1800 ლარამდე. მემანქანის ხელფასი არის 1093 ლარი პლუს დანამატი 55 ლარი მავნე პირობებისთვის და ღამის მოცდენის საათები 31.60 ლარი, რაც გამოდის ხელზე ასაღები თანხა 1200 ლარამდე,“-განაცხადა მეტროს მემანქანე ნუგზარ გაგუამ.

მეტროს თანამშრომლების განცხადებით, ისინი ხელფასების 45% პროცენტით გაზრდას და 2013 წლის სახელფასო ნიშნულზე დაბრუნებას ითხოვენ.

„ვითხოვთ ხელფასის იმ ნიშნულზე დაყენებას რაც იყო 2013 წელს, მოხდა ინფლაცია გაუფასურება და ეს არ არის ხელფასის მატება“-აცხადებს მეტროს თანამშრომელი ხათუნა ჩიტიაშვილი.

მეტროპოლიტენის თანამშრომლების გაფიცვის გამო, დღეს დედაქალაქში მეტრო არ მუშაობს, თბილისის მერმა მეტროს თანამშრომლები მოქალაქეების შანტაჟში დაადანაშაულა და გაანცხადა, რომ ამ ეტაპზე არანაირი შესაძლებლობა არ არსებობს ამის, რომ მემანქანეებს ხელფასი 45%-ით მოემატოთ.