ოპოზიციური პარტიების კონსულტაცია ლეიბორისტული პარტიის ოფისში ცოტა ხნის წინ დასრულდა. ოპოზიციის ლიდერების განცხადებით მხოლოდ მთავარი პროკურორის გადაყენება პროცესებს ვერ განმუხტავს. მათი თქმით ხელისუფლებამ ქმედითი ნაბიჯები უნდა გადადგას.

„ეროვნულ-დემოკრატიული პარტიის“ ლიდერის ბაჩუკი ქარდავას განცხადებით, სუსი და ხელისუფლება ზაზა სარალიძისა და აქციის მონაწილეების შავ პიარს ეწევა:

„ძალიან მნიშვნელოვანი შეთანხმება მოხდა დღეს თითქმის სრულ ოპოზიციურ სპექტრს შორის, ჩვენი მთავარი მოთხოვნა არის ის მოთხოვნა, რომელიც აქვს ზაზა სარალიძეს და საზოგადოებას, რომელიც დღეს არის შეკრებილი თბილისის ცენტრში. რაც შეეხება იმას თუ რა ისმის საზოგადოების ნაწილისგან, ან ეს ადამიანები არიან შეცდომაში შეყვანილი, ან მინდა მათ იცოდნენ, რომ ერთადერთი ვინც დღეს მუშაობს ამაზე, რომ განახორციელოს ზაზა სარალიძისა და აქციის მონაწილეების წინააღმდეგ შავი პიარი, არის სუსი. მთელი ღამის განმავლობაში მე ვაკვირდებოდი სოციალურ ქსელებს და მინდა გითხრათ, ხელისუფლებამ ბიძინა ივანიშვილის მეთაურობით ამჯერად ვერ გაბედა კონტრაქციების მოწყობა რუსთაველზე და მას ეს ვერ გაუვიდოდა. მაგრამ მან სცადა კონტრაქციის მოწყობა სოციალურ ქსელებში და იმ ადამიანების გაშავება, რომლებიც არიან დატანჯული, გამწარებული, აქვთ უზარმაზარი ტრაგედია და თავიანთი სამართლიანობის აღდგენისთვის იბრძვიან“, - განაცხადა ბაჩუკი ქარდავამ.

ედპ-ს ლიდერის თქმით, იგი იდგება ზაზა სარალიძის გვერდითდ ა როგორც რიგითი მოქალაქე და არა როგორც პოლიტიკოსი, მიიღებს მონაწილეობას დღეს დაანონსებულ აქციაში:

„მე როგორც ორი შვილის მამა, რიგითი საქართველოს მოქალაქე ვალდებული ვარ ვიდგე ამ აქციაზე და ვალდებული ვარ დავუდგე ზაზა სარალიძეს გვერდით, არ აქვს მნიშვნელობა მე პოლიტიკოსი ვარ თუ რა საქმიანობას ვეწევი“, - განაცხადა ბაჩუკი ქარდავამ.