ხორავას ქუჩის საქმეზე განვითარებულ მოვლენებს და ამასთან დაკავშირებით საზოგადოების და ხელისუფლების რეაქციას ნიკა მელია გამოეხმაურა. „ერთიანი ნაციონალური მოძრაობის“ პოლიტსაბჭოს ხელმძღვანელის თქმით, ოპოზიციური პოლიტიკური პარტიების წარმომადგენლები ზაზა სარალიძის მხარდამჭერ აქციებში მონაწილეობას რიგითი მოქალაქეების სტატუსით გააგრძელებენ, იმისთვის რომ საშუალება არ მისცენ ხელისუფლებას, რომ ეს რომელიმე ოპოზიციური პარტიის მიერ მართულ აქციად შეაფასონ, თუმცა აქტიურად დააკვირდებიან, იმ ქმედებებს, რომელსაც ხელისუფლება ზაზა სარალიძის მოთხოვნების საპასუხოდ გადადგამს.

ნიკა მელია საქართველოს პრემიერ-მინისტრის გუშინდელ განცხადებასაც გამოეხმაურა:

„რა უნდა ვთქვა იმ ადამიანზე , რომელსაც ბოლომდე აქვს რწმენა დაკარგული და თვითონაც არ წარმოუდგენია რომ პრემიერ-მინისტრია. აქამდე თუ ნომინალური იყო... თქვენ უფრო ხართ პრემიერი, ვიდრე კვირიკაშვილი... მაგრამ მთავარზე ვისაუბროთ, ყველა დამნაშავის დასჯას აპირებს ხელისუფლება? არა მარტო მკვლელების, არამედ იმ ადამიანებისაც ვინც მათ ხელს აფარებდა? ეს ადამიანები, ვინც ხელს აფარებდა არ არიან მარტო პროკურატურაში და ძალოვან სტრუქტურებში, პოლიტიკური ხელმძღვანელები არიან და არა ერთი.

თუ ხელისუფლება მზადაა სისხლის სამართლის პასუხისგებაში მისცეს საკუთარი თავი და თავისი წარმომადგენლები, კი ბატონო, დავაკვირდებით ამ პროცესებს.

დღეს ამაზე შევთანხმდით, რომ არცერთ პოლიტიკურ ოპოზიციურ პარტიას არ აქვს და არ უნდა ქონდეს უფლება, რომ დედაქალაქის ცენტრში მიმდინარე საპროტესტო აქცია, საკუთარი ვიწრო პარტიული ინტერესებისთვის გამოიყენოს. მაგრამ ეს იმას არ ნიშნავს, რომ ჩვენ არ გვაქვს ჩვენი პოლიტიკური მოთხოვნები, ჩვენ ვაკვირდებით ჯერ კიდევ, ვნახავთ რა ნაბიჯებს გადადგამს „ქართული ოცნების“ ხელმძღვანელობა და როგორ შეასრულებს მოთხოვნებს და ამის შემდეგ ბუნებრივია პოლიტიკოსები ჩავერთვებით ძალიან აქტიურად და ეს ყველაფერი იქნება ძალიან გამჭვირვალე. ვითვალისწინებთ რა იმას, რომ ეს არის ყველაზე დიდი ტრაგედია, რაც უკანასკნელ პერიოდში მომხდარა."- განაცხად ნიკა მელიამ