„შოთაძეს უნდა მიბაძონ კოლექტიურმა მურისიძეებმა,“ - აცხადებს უმრავლესობის წევრი დავით ჭიჭინაძე, რომელმაც უმრავლესობიდან პირველმა განაცხადა, რომ ყოფილ მთავარ პროკურორს თანამდებობა უნდა დაეტოვებინა.

„იმან, რაც ახლა რუსთაველზე ხდება, არ შეიძლება, ნებისმიერ ადამიანში ემოცია არ გამოიწვიოს. 2012 წელს, როცა ჩვენ, „ქართული ოცნება“ მოვდიოდით, ხალხს ვპირდებოდით სამართლიანობის აღდგენას. სამწუხაროდ, 5-6 წლის თავზე ჩვენ ვღებულობთ მიტინგებს და მთავარი მოთხოვნა ისევ არის სამართლიანობის აღდგენა. ვერ მოვერიეთ „კოლექტიურ მურუსიძეებს“, ეს ისაა, რასაც ჩვენი საზოგადოება არასოდეს შეეგუება. ნურავის ჰგონია, რომ ჩვენი საზოგადოება უსამართლობას შეეგუება. ყველა არჩევნები იყო ბრძოლა უსამართლობასთან და ვფიქრობ, ეს არის ყველაზე მძიმე განაჩენი - თუ არ წამოვწევთ იმ ღირსეულ ადამიანებს, რომლებიც მრავლად არიან „ქართულ ოცნებაში“ და ჩვენი სახეები ისევ იქნებიან „კოლექტიური მურუსიძეები“, ჩვენ, რა თქმა უნდა, ამ შედეგს მივღებთ და არ ვიცი, როგორი გაგრძელება ექნება, თუ დროულად შესაბამისი ზომები არ მივიღეთ,“ - აცხადებს ჭიჭინაძე.

მისივე თქმით, ხელისუფლების სეცდომა ისაა, რომ ცდილობს იმ ადამიანების გადმობრება, რომელთაც რაღაც დანაშაული აქვთ ჩადენილი.

„როცა ადამიანს დანაშაულის ჩადენა შეუძლია, ეს მისი ბუნებრივი ხასიათია. პატიოსან ადამიანს კი ვერავინ აიძულებს, რომ დანაშაული ჩაიდინოს. რადგან ეს ხალხი არ გავუშვით სახლში, არ გამოვიკვლიოთ მათი დანაშაულობები და დღესაც კი დიდი თანამდებობები უკავიათ და ქვეყანაში, პრინციპში, სამართალს განაგებენ, რა თქმა უნდა, ეს იყო ჩვენი ყველაზე დიდი შეცდომა. ასეთივე შეცდომა იყო თავის დროზე ზვიად გამსახურდიასი, როცა მან კომუნისტები დაიტოვა და ეგონა, რომ კომუნისტებით ააშენებდა დამოუკიდებელ საქართველოს,“ - აცხადებს ჭიჭინაძე და დასძენს, რომ თუ მთავარი პროკურორად ისეთი ადამიანის კანდიდატურა არ იქნა შერჩეული, რომელსაც აქვს მაღალი ნდობის ხარისხი, ძნელია, ადამიანებს დაუბრუნდეთ ის რწმენა, რომელიც 2012 წელს ჰქონდათ.