დმანისისა და აგარაკ-ტაშირის, დიდი ბრიტანეთისა და ირლანდიის მთავარეპისკოპოსმა რუსთაველის გამზირზე შეკრებილებს წერილით მიმართა, სადაც ხორავას ქუჩაზე მოკლული დავით სარალიძის მამის, ზაზა სარალიძის მხარდაჭერისკენ მოუწოდა საზოგადოებას:

„თანატოლთაგან სიკვდილისთვის უმოწყალოდ გამეტებული დავით სარალიძის და ლევან დადუნაშვილის გულდამწვარო მშობლებო და ოჯახის წევრებო, მგლოვიარეთა და ჩაგრულთა შეუპოვარო ჭირისუფალო, საქართველოს მოქალაქენო, მიიღეთ ჩვენი თანადგომა და მზრუნველობა დიდ ბრიტანეთსა და ირლანდიაში მცხოვრები მრავალათასიანი, ქრისტიანული ქართული თემის სახელით.

ჩვენი მზერა ეს დღეებია შეუჩერებლად მოპყრობილია სამართლიანობისთვის მებრძოლი თქვენი მამაცი და მგრძნობიარე გულებისაკენ, ჩვენი მზერა და მწუხარება მოპყრობილია უმწიკვლო ჭაბუკთა სასიკვდილოდ დასერილი და განგმირული გულებისაკენ.

ასევე მოგმართავთ იმ ახალგაზრდების მშობლებს, რომელთა ხელებმაც შეაჩერეს მათი თანატოლების სიცოცხლის მოტრფიალე გულისცემა, ამაღლდით ყოველგვარ ეგოისტურ გრძნობაზე მაღლა და გააღვიძეთ შვილებში დანაშაულზე პასუხისმგებლობა.

ნუ აქცევთ თქვენს შვილებს მოარულ ხიზნებად და მათივე ბოროტების მსხვერპლად. გამბედაობას გვაძლევს ჩვენ ბატონ ზაზა სარალიძის მაღალი მოქალაქეობრივი პასუხისმგებლობით აღსავსე განცხადებები. არ სურს მისი შვილების მეგობრები უსამართლობის განცდის მიზეზით დაადგნენ შურისძიების გზას. მოგმართავთ ხელისუფლებას, დაიცავით და აღადგინეთ ხალხში სამართლიანობის განცდა“, - დაიცავით და აღადგინეთ სამართლიანობის განცდა“, - ნათქვამია მეუფე ზენონის წერილში.