უმრავლესობის წევრი რომან კაკულია ხორავას ქუჩაზე მომხდარ მკვლელობაზე დროებითი საგამოძიებო კომისიის შექმნის მომხრეა

პოლიტიკა - 13:57, 31 May, 2018

1214

უმრავლესობის წევრი რომან კაკულია ხორავას ქუჩაზე მოხმდარი მოზარდების მკვლელობის საქმეზე თანაგუნდელებს დროებითი საგამოძიებო კომისიის შექმნას ურჩევს.

„დღის წესრიგში რომ იდგეს მხოლოდ ის საკითხი, როგორია პოზიცია ყველა ჩვენთაგანის, თუ როგორ მივიდეთ სიმართლემდე, ეს სხვა თემა იქნებოდა. რა შემთხვევაში იქმნება კომისია – როცა სხვა ინსტრუმენტები ამოწურავს თავის თავს. ჩვენ შეგვიძლია, თუ მარტო ამ ლოგიკას გავყვებით, დაველოდოთ და მერე უკვე გამართლებულად ვიტყვით, რომ მოდით შევქმნათ კომისია. მაგრამ ახლა არაორდინალური სიტუაციაა.

ახლა ჩვენ კომუნიკაცია გვაქვს საზოგადოებასთან პირდაპირ და ძალიან მნიშვნელოვანია, საზოგადოებას ვუთხრათ, რომ იმ მეორე პროცესშიც, რომელიც გაგრძელდება, ჩვენ პარლამენტი ვართ მათ გვერდით. ჩემი აზრით, ეს არის ყველაზე მთავარი. რატომ შეუქმნის ეს – კომისიის შექმნა რაიმე პრობლემას ამ პროცესს, მართალი გითხრათ, არ მესმის. წარმოვიდგინოთ, რომ მეორე ინსტანციაზეც იგივე შედეგი დადგა, მესამეზეც ხომ შეიძლება იგივე შედეგი დადგეს. ამიტომ, ვერ ვხედავ მიზეზს, რომ ეს ფიქრი გადავიყვანო იმ ლოგიკურ ფიქრში, როდესაც კომისიას ვქმნით მხოლოდ იმ შემთხვევაში, როცა სხვა ინსტრუმენტების ამოწურვას უნდა დაველოდოთ და მერე შევქმნათ. ჩემი აზრით, ეს ის შემთხვევა არ არის“, – განაცხადა ბიუროს სხდომაზე რომან კაკულიამ.