"აშკარად, ჩანს რომ საქმე ბოლომდეა მისაყვანი" - ირაკლი კობახიძე არასრულწლოვნების მკვლელობის განაჩენზე

პოლიტიკა - 13:12, 31 May, 2018

2400

საქართველოს პარლამენტის თავმჯდომარე ირაკლი კობახიძე ბიუროს სხდომაზე არასრულწლოვნების მკვლელობაზე სასამართლოს განაჩენს გამოეხმაურა. მისი თქმით, ამ საქმეზე პროკურატურა გეგმავს სააპელაციო დონეზე განაჩენის გასაჩივრებას.

„საქმე ეხება არასრულწლოვანი ბავშვების მკვლელობას. მოვისმინეთ ჩვენ განაჩენი ამ საქმესთან დაკავშირებით, მოვისმინეთ პროკურატურის პოზიცია, რომელიც აცხადებს, რომ არ გაიზიარა სასამართლომ მისი მტკიცებულებები. შესაბამისად, პროკურატურა გეგმავს სააპელაციო დონეზე განაჩენის გასაჩივრებას და მინდა, დიდი იმედი გამოთქვა, რომ საერთო ჯამში მართლმსაჯულების სისტემაში დადგება სამართლიანი განაჩენი ამ ძალიან მნიშვნელოვან საქმეზე, რომელიც ეხება ძალიან მძიმე დანაშაულს არასრულწლოვანი ბავშვების მკვლელობას. როდესაც ორი ადამიანი, ორი ბავშვია მოკლული და ერთ შემთხვევაში დგება დასრულებულ დანაშაულზე განაჩენი და მორე შემთხვევაში მცდელობაზე. აშკარაა, რომ საქმე ბოლომდე არის მისაყვანი, ეს აშკარად ჩანს. აქედან გამომდინარე, ჩვენ თქვენგან განსხვავებით აპრიორი არც ერთ მხარეს არ ვუცხადებთ ნდობას ჩვენ ვამბობთ, რომ ეს საკითხი საბოლოოდ უნდა გაირკვეს და საბოლოოდ უნდა დადგეს სამართლიანი განაჩენი. ეს არის ჩვენი პოზიცია და შესაბამისად, არასწორია აპრიორი ერთ მხარეს ნდობის გამოცხადეს და მეორე მხარეს უნდობლობის გამოცხადება. ჩვენ უნდა გავარკვიოთ რეალურად რაშია საქმე" - აღნიშნა პარლამენტის თავმჯდომარემ.