"51-ე სკოლის ადმინისტრაციას მივმართავ ჩემი მეორე შვილის უსაფრთხოება უზრუნველყონ"- ზაზა სარალიძე

პოლიტიკა - 13:05, 31 May, 2018

17171

ხორავაზე მოკლული დავით სარალიძის მამა პროკურატურის მაღალჩინოსნების პასუხისმგებლობას მოითხოვს, მისი თქმით, დამნაშავეების ხელის დაფარებაში ჩართული იყო არა მარტო პროკურატურის ყოფილი მაღალჩინოსანი მირზა სუბელიანი, არამედ საქმის პროკურორებიც. ის 51-ე სკოლის ადმინისტრაციას მოუწოდებს, რომ მისი მეორე შვილის უსაფრთხოება უზრუნველყონ. ზაზა სარალიძე საპროტესტო აქციას მთავარ პროკურატურასთან მართავს და აცხადებს, რომ ის იქ დარჩება მანამდე ვიდრე მისი მოთხოვნები არ დაკმაყოფილდება:

„დაუყოვენებლივ იქნას თანამდებობიდან გათავისუფლებული შოთაძე, ასევე პასუხისგებაში იქნას მიცემული, იქიდან გამომდინარე, რომ პირველივე დღიდან იყო საქმის გაყალბებაში ჩართული. დაუყოვნებლივ პასუხისგებაში იქნეს მიცემული მალხაზ კაპანაძე- ქალაქის პროკურორი, რომელიც ურცხვად ტყუილებს ამბობდა საზოგადოების წინაშე. დაუყოვნებლივ პასუხისგებაში იქნეს მიცემული ზვიად ფხაკაძე, იმედა გუგუშვილი რომლებიც ჩემი საქმის პროკურორები იყვნენ და პირადად წვდომა ქონდათ ამ საქმის გაყალბებასთან. დღესვე პასუხისგებაში იქნეს მიცემული მირზა სუბელიანი და მისი ოჯახის წევრები. აბსოლუტურად ყველა დამანშავე ვინც ჩემი შვილი მოკლა. აქედან ფეხს არ მოვიცვლი, სანამ პასუხისმგებლობას არ ააღებინებენ ყველა იმ პირს ვინც აქტიურად იყო ჩართული არა მარტო გაყალბებაში, არამედ ჩემი შვილის მკვლელობაში. მე უკვე ვიცი ვინაა ჩემი შვილის მკვლელი, მაგრამ ისინი არ აპირებენ იმათ დასჯას. ყველა შვილმკვდარ მშობელს მოვუწოდებ დამიდექით გვერდში. სისტემამ ჩემი განადგურება მოინდომა, მაგრამ სისტემას მე გავანადგურებ ან მომკლან. 51-ე სკოლის ადმინისტრაციას მივმართავ ჩემი მეორე შვილის უსაფრთხოება უზრუნველყონ ახლავე. ამათგან ყველაფერი მოსალოდნელია უკვე.“- განაცხადა ზაზა სარალიძემ.