"ნაციონალური მოძრაობა" " ოცნების" დეპუტატის, შოთა შალელაშვილის საქმიანობის შესწავლას ითხოვს

პოლიტიკა - 14:49, 28 May, 2018

1136

„ერთიანი ნაციონალური მოძრაობა“ ბიძინა ივანიშვილის კუთვნილი კომპანიების და უპირველესად თანაინვესტირების ფონდის საქმიანობის შესწავლას ითხოვს.

ენმ-ში აცხადებენ, რომ შალელაშვილთან დაკავშირებული სკანდალი ადასტურებს, რომ შესაძლოა ამ ფონდს კრიმინალური გზით მოპოვებული ფულის გასათეთრებლად იყენებდნენ.

„დეპუტატ შალელაშვილის ოჯახის წევრები დაკავშირებული არიან სერიოზულ საერთაშორისო დანაშაულებრივ ჯგუფთან რომელთა მიმართ ამერიკის მთავრობას აქვს სერიოზული ბრალდებები. ფაქტია, რომ შალელაშვილის საქმიანობა ბურუსით არის მოცული და სწორედ ივანიშვილი პარტნიორობას უკავშირდება. არის სერიოზული ეჭვი,რომ საერთაშორისო ფინანსური დანაშაულებრივი გზით მოპოვებული თანხების გარეცხვა ხდება საქართველოში და ამ გზით კომპანიების დაარსება.

ამიტომ საქართველოს პროკურატურამ პირველ რიგში უნდა გამოიძიოს ამ თანხების წარმომავლობა, მათ შორის თანაინვესტირების ფონდის თანხების წარმომავლობაც და სერიოზული დოკუმენტები უნდა მიაწოდოს ამერიკის მთავრობას შემდგომი გამოძიების უზრუნველსაყოფად,“- აცხადებს ლევან ბეჟაშვილი.

საქართველოს მესამე პრეზიდენტი მიხეილ სააკაშვილი „ქართული ოცნების“ თავმჯდომარე ბიძინა ივანიშვილსა და უმრავლესობის წევრ შოთა შალელაშვილს საერთაშორისო მაფიის ფულის გათეთრებასა და რუსულ სპეცსამსახურებთან ერთად მოქმედებაში ადანაშაულებს. სკანდალური განცხადება მიხეილ სააკაშვილმა გადაცემა „კვირის აქცენტებში“ გააკეთა.სააკაშვილის თქმით, რამდენიმე წლის წინ, აშშ-ის ტერიტორიაზე მომხდარ ყველაზე მხვილ ჰაკერულ თავდასხმაში, რომელიც უდიდეს კიბერძარცვად ითვლება, „ქართული ოცნების“ წევრის შოთა შალელაშვილის შვილი მონაწილეობდა, რომელიც ფულს რუსი ჰაკერების დახმარებით იპარავდა. საუბარია დაახლოებით, 2 მილიარდ დოლარზე, რომელიც სააკაშვილის , საქართველოში შემოედინებოდა და მისი გათეთრება ივანიშვილის თანაინვესტირების ფონდის მეშვეობით ხდებოდა.