2 მილიონამდე ლარის პრემია და 180 ათასი ლარი მხოლოდ საკონსტიტუციო სასამართლოს თავმჯდომარის მანქანის შეძენად

2 მილიონამდე ლარის პრემია და 180 ათასი ლარი მხოლოდ საკონსტიტუციო სასამართლოს თავმჯდომარის მანქანის შეძენად - IDFI-ის სკანდალური კვლევა

პოლიტიკა - 12:00, 28 May, 2018

2958

"ინფორმაციის თავისუფლების განვითარების ინსტიტუტის“ მონიტორინგის მიხედვით, საკონსტიტუციო სასამართლოს საქმიანობა გაუმჭვირვალეა, ფინანსები კი არარაციონალურად იხარჯება.

ორგანიზაციის მონიტორინგის შედეგად ირკვევა, რომ ბოლო ხუთი წლის განმავლობაში 2 მილიონამდე ლარი პრემიებზე დაიხარჯა, 180 ათასი ლარი კი მხოლოდ საკონსტიტუციო სასამართლოს თავმჯდომარის მანქანის შეძენას მოხმარდა.

IDFI-ის კანონის უზენაესობის მიმართულების ხელმძღვანელის, გიორგი ბერაიას განცხადებით, მონიტორინგის შედეგად, საკონსტიტუციო სასამართლოს შესახებ მოქმედ კანონმდებლობაში არაერთი პრობლემა გამოვლინდა.

“ჩვენს მიერ ჩატარებული მონიტორინგის შედეგად გამოვლინდა რიგი ხარვეზები სასამართლო საქმიანობასთან დაკავშირებით, მაგალითად ეს შეეხება საჯარო ინფორმაციის გაცემასთან დაკავშირებულ საკითხებს, ასევე მოსამართლეთა მიმართ დისციპლინურ სამართალწარმოების გაუმჭვირვალობას.

ფინანსურ ანგარიშებთან დაკავშირებით აღსანიშნავია, რომ კითხვები გვაქვს ზოგიერთი ხარჯის რაციონალურობასთან დაკავშირებით, მაგალითად საკონსტიტუციო სასამართლოს თავმჯდომარის მიერ შეძენილი თითქმის 180 ათას ლარიანი მანქანა არის ერთ-ერთი მაგალითი.

ამის გარდა ასევე განვახორციელეთ საკონსტიტუციო სასამართლოს კანონმდებლობის მონიტორინგი, მოვამზადეთ კანონპროექტი იმ ხარვეზების აღმოსაფხვრელად, რაც ჩვენი აზრით დღევანდელ კანონმდებლობაში არსებობს. დღეს ამ კანონპროექტს გადავუგზავნით პარლამენტს, რომელიც იმედი გვაქვს, რომ საკონსტიტუციო სასამართლოს ფართომასშტაბიან რეფორმას დაიწყებს“,- განაცხადა გიორგი ბერაიამ.