საერთაშორისო მაფიის მიერ მოპარულის საქართველოში გათეთრება - „ოცნებელი“ შალელაშვილი სააკაშვილის სკანდალურ ბრალდებებს არ პასუხობს

პოლიტიკა - 10:38, 28 May, 2018

2010

„ქართული ოცნების“ დეპუტატი შოთა შალელაშვილი საქართველოს მესამე პრეზიდენტის, მიხეილ სააკაშვილის სკანდალურ განცხადებებს არ პასუხობს.

როგორც „ნიუპოსტს“ უმრავლესობის დეპუტატმა განუცხადა, ის საქართველოში არ იმყოფება და სააკაშვილის ბრალდებებს 2-3 დღეში, საქართველოში დაბრუნების შემდეგ უპასუხებს.

შალელაშვილის წინააღმდეგ სკანდალური განცხადება მიხეილ სააკაშვილმა გუშინ, "კვირის აქცენტებში" ჩართვისას გააკეთა.

"შოთა შალელაშვილი საერთაშორისო მაფიის მიერ მოპარულ ფულს საქართველოში, თანაინვესტირების ფონდის მეშვეობით ათეთრებს"- განაცხადა საქართველოს მესამე პრეზიდენტმა.

სააკაშვილმა საერთაშორისო მაქინაციურ სქემეში მონაწილეობისთვის სწორედ „ქართული ოცნების“ დეპუტატი ამხილა.

სააკაშვილი ამბობს, რომ აშშ-ის ტერიტორიაზე განხორციელებულ კიბერძარცვაში შოთა შალელაშვილის შვილი მონაწილეობდა.

საქართველოს მესამე პრეზიდენტის ინფორმაციით, შალელაშვილის შვილი ფულს რუსი ჰაკერების დახმარებით იპარავდა. საუბარია დაახლოებით 2 მილიარდ დოლარზე, რომელიც სააკაშვილის მტკიცებით, მოგვიანებით საქართველოში შემოედინებოდა და მისი გათეთრება ივანიშვილის თანაინვესტირების ფონდის მეშვეობით ხდებოდა.