ხორავას ქუჩაზე მოკლული არასრულწლოვანის მამის ზაზა სარალიძის და მთავარი პროკურორის შეხვედრა არ შედგა. ჩაშლილი შეხვედრის შემდეგ ზაზა სარალიძემ კომენტარი მედიასთან გააკეთა და განაცხადა, რომ შოთაძემ არ ისურვა რომ ზაზა სარალიძეს თავის ოფიციალურ წარმომადგენლებთან ერთად შეხვედროდა. მოკლული მოზარდის მამა ეჭვობს, რომ პროკურატურას მისი დაშანტაჟება უნდოდა და სწორედ ამიტომ სურდათ მასთან მარტო შეხვედრა:

„6 თვეა ვიბრძვი ამ საქმეზე ჭეშმარიტების დასადგენას, ირაკლი შოთაძემ გამოთქვა შეხვედრის სურვილი , რაზედაც დავთანხმდი და დღეს მოვედით გენერალურ პროკურატურაში ჩემს ოფიციალურ წარმომადგენლებთან ერთად, იმ პირებთან ერთად, რომლებიც იცავენ არა მარტო ჩემს უფლებებს, არამედ ჩემი მოკლული შვილის უფლებებსაც. ბატონმა შოთაძემ მათთან საუბარი არ ისურვა და აქედან გამომდინარე არც მე არ დავთანხმდი მარტო შეხვედრაზე. ალბათ ფიქრობდა რომ ან დამაშანტაჟებდა ან ზეწოლას განახორციელებდა ჩემზე და იმიტომ უნდოდა მარტო შევეტყუებინე პროკურატურაში.“- განაცხადა ზაზა სარალიძემ.