ასი წლის წინ საქართველოს მიეცა შანსი იმისათვის, რომ იაროს პროგრესული გზით. ჩვენ გავაგრძელებთ თქვენს მხარდაჭერას

ასი წლის წინ საქართველოს მიეცა შანსი იმისათვის, რომ იაროს პროგრესული გზით. ჩვენ გავაგრძელებთ თქვენს მხარდაჭერას - დალია გრიბაუსკაიტე

პოლიტიკა - 18:18, 25 May, 2018

797

საქართველოსა და ლიეტუვის პრეზიდენტებმა პირისპირ შეხვედრის შემდეგ ქართული და უცხოური მედიისათვის პრესკონფერენცია გამართეს და ჟურნალისტების შეკითხვებს უპასუხეს.

როგორც ლიეტუვის პრეზიდენტმა დალია გრიბაუსკაიტემ განაცხადა, მისთვის ძალიან მნიშვნელოვანია საქართველოს გვერდით ყოფნა პირველი რესპუბლიკის 100 წლის იუბილეზე.

"მეც მინდა საქართველოს ჭეშმარიტი სახელი გამოვიყენო თქვენი ქვეყნის აღსანიშნავად, როგორც თქვენ გამოიყენეთ ჩემი ქვეყნისათვის - ლიეტუვა. ორ ქვეყანას შორის მეგობრობა სულ უფრო და უფრო უმჯობესდება. ასი წლის წინ საქართველოს მიეცა შანსი იმისათვის, რომ იაროს პროგრესული გზით. ჩვენ გავაგრძელებთ თქვენს მხარდაჭერას, როგორც ევროპის კავშირის, ასევე, აღმოსავლეთ პარტნიორობის პროგრამის ფარგლებში, იმიტომ რომ საქართველო ნამდვილად მოწინავე ქვეყანაა და საუკეთესო მაგალითია რეფორმებისა და მიღწევების თვალსაზრისით.

ამავეს ვიტყოდი ნატოს-ს შესახებაც. მთელს მსოფლიოში უსაფრთხოებას გარკვეული გამოწვევები გააჩნია და ყველა თანხმდება, რომ გეოპოლიტიკის დინამიკა ძალიან სწრაფად ვითარდება და იცვლება.

კავკასიაში ნატო-სათვის მხოლოდ თქვენი ქვეყანაა საუკეთესო პარტნიორი თანამშრომლობის, საკუთარი რეგიონის დაცვისა და საერთაშორისო თანამშრომლობის თვალსაზრისით. თქვენი ქვეყანა საერთაშორისო უსაფრთხოებას იცავს საერთაშორისო მისიებში მონაწილეობით. საქართველოს ყოველივე ამით უადვილდება ნატო-სკენ სავალი გზა. თვითონ ფორმალური მხარეების დაჩქარება, რა თქმა უნდა, საჭიროა და ჩვენ ვიქნებით თქვენს გვერდით", - აღნიშნა დალია გრიბაუსკაიტემ.