"რკინიგზის საკითხი საერთოდ არ განხილულა, ტატუნაშვილზე განცხადა, რომ ეს ძალიან სამწუხარო ფაქტია"- რაზე ისაუბრეს აბაშიძე-კარასინმა

პოლიტიკა - 15:50, 24 May, 2018

1202

პრაღაში აბაშიძე-კარასინის მორიგი შეხვედრის შემდეგ საქართველოს პრემიერ-მინისტრის სპეციალური წარმომადგენელმა რუსეთთან ურთიერთობის საკითხებში ზურაბ აბაშიძემ, იმ თემებზე ისაუბრა, რომელიც რუსეთის საგარეო საქმეთა მინისტრის მოადგილესთან შეხვედრის დროს განიხილა. მიუხედავად იმისა, რომ ეს იყო პირველი შეხვედრა, რომელიც საბაჟო მონიტორინგის შესახებ ხელშეკრულების გაფორმების შემდეგ გაიმართა, აბაშიძის თქმით, შეხვედრაზე საუბარი არ ყოფილა, საქართველოს ოკუპირებული რეგიონის, აფხაზეთის გავლით სარკინიგზო მიმოსვლის შესახებ:

„რკინიგზის საკითხი საერთოდ არ განხილულა არც საელჩოს და არც კულტურული ურთიერთობების კონტექსტში. საერთოდ არ ხსენებულა რკინიგზის საკითხი.“- განაცხადა აბაშიძემ.

რაც შეეხება არჩილ ტატუნაშვილის მკვლელობის საკითხის, ზურაბ აბაშიძის თქმით, კარასინმა განაცხადა, რომ ეს სამწუხარო ფაქტია და მსგავსი რამ აღარ უნდა განმეორდეს.

„რუსმა კოლეგამ განაცხადა, რომ ეს ძალიან სამწუხარო ფაქტია, რომ ყველაფერი უნდა გაკეთდეს იმისთვის, რათა ასეთი რამ აღარ განმეორდეს და თქვა ის რასაც ველოდი, რომ ამაზე საუბარი უნდა გაგრძელდეს ჟენევის ფორმატში.“-განაცხადა აბაშიძემ.