თავიდანვე მსურს მკაფიოდ განვაცხადო, რომ საქართველოსთან მიმართებით ვმუშაობთ ნატო-ში გაწევრიანებაზე

თავიდანვე მსურს მკაფიოდ განვაცხადო, რომ საქართველოსთან მიმართებით ვმუშაობთ ნატო-ში გაწევრიანებაზე - აშშ-ს სახელმწიფო მდივანი

პოლიტიკა - 09:33, 24 May, 2018

1139

ამერიკის შეერთებული შტატების სახელმწიფო მდივანმა სენატის საგარეო კომიტეტის მოსმენისას საქართველოს შესახებ ისაუბრა.

სენატორის კითხვაზე, რომელიც საქართველოს, უკრაინისა და მოლდოვას წინააღმდეგ რუსულ აგრესიას უკავშირდებოდა, მაიკ პომპეომ უპასუხა, რომ შეერთებული შტატები დაეხმარება ყოფილ საბჭოთა კავშირის რესპუბლიკებს, რომლებსაც დასავლეთის კურსი აქვთ არჩეული.

„გვაწუხებს რუსეთის აგრესია, რომელიც თავიდან მოლდოვაში დაიწყო, შემდეგ საქართველოს რეპუბლიკას მისწვდა და მოგვიანებით უკრაინაში 10 000 ადამიანი იმსხვერპლა. კიდევ რა შეიძლება მოვიმოქმედოთ ჩვენს მოკავშირეებთან ერთად საჭირო შეიარაღების უზრუნველსაყოფად, განსაკუთრებით სამ ხსენებულ რესპუბლიკაში, რათა პუტინის რეჟიმის აგრესია შევაჩეროთ?“- განაცხადა ჯო უოლსონმა.

აშშ-ს სახელმწიფო მდივანმა, მაიკ პომპეომ კი განაცხადა, რომ დაინტერესებულია იმ ქვეყნების შეიარაღების შესწავლით, რომლებსაც რუსეთი ავიწროვებს.

"არ ვიცი იმ სამი ქვეყნის შეიარაღების საკითხები. სიამოვნებით გავეცნობი საკითხს უფრო დეტალურად. ამ კვირაში საქართველოს პრემიერ-მინისტრთან დიალოგი სტრატეგიული პარტნიორობის ფარგლებში გვქონდა სახელმწიფო დეპარტამენტში. თავიდანვე მსურს მკაფიოდ განვაცხადო, რომ საქართველოსთან მიმართებით ვმუშაობთ ნატო-ში გაწევრიანებაზე. ეს ის საკითხებია, რომლითაც შეგვიძლია დავეხმაროთ ამ ქვეყნების მოსახლეობას სწორი გზით. გასულ წელს ასევე მივიღეთ გადაწყვეტილება, რომ უკრაინისთვის იარაღი და სისტემები მიგვეწოდებინა, რასაც ამჟამად იყენებენ. ბევრი რამ დარჩა გასაკეთებელი იმ ყოფილი საბჭოთა ქვეყნების წარმოჩინებისთვის, რომლებიც დასავლეთის გზას ადგანან,“- განაცხადა მაიკ პომპეომ.