"ხაბარელი ცეცხლზე ნავთს ასხამს... სკამს ნაკლებად მივტირი, გაფუჭებული იყო და შეცვლას ვაპირებდი"- ქევხიშვილი ძიუდოისტების პროტესტს ეხმაურება

პოლიტიკა - 16:52, 23 May, 2018

1463

ძიუდოისტების პროტესტს, რომელიც უკვე 20 დღეა მიმდინარეობს ძიუდოს ფედერაციის პრეზიდენტი მართულ პროცესს უწოდებს. გუშინ ამ პროტესტმა განსაკუთრებული მკვეთრი ხასიათი მიიღო, სპორტსმენებმა ფედერაციის პრეზიდენტს კაბინეტის კარი აუჭედეს, მისი კაბინეტის სკამი გარეთ გამოიტანეს და გადააგდეს. ძიუდოისტების თქმით, სწორედ ქევხიშვილის არასათანადო მუშაობის ბრალია ქართულ ძიუდოში შემქნილი სიტუაცია და ის, რომ ევროპის ჩემპიონატიდან ქართველი ძიუდოისტები უმედლოდ დაბრუნდნენ.

„სკამს, ამ შემთხვევაში ფიზიკური გაგებით, ნაკლებად მივტირი, იმიტომ რომ გაფუჭებული იყო და შეცვლას ვაპირებდი. აქ არ არის საუბარი იმაზე, რომ მე დავით ქევხიშვილი, როგორც ფედერაციის პრეზიდენტი დავიცვა და შესაბამისად პოსტს მივტირი. საუბარია იმაზე, რომ ზოგადად ფედერაციის პრეზიდენტის ინსტისტუტს ჭირდება დაცვა. ეს პირველად არ ხდება და ჩვენ სამწუხაროდ დავდივართ ერთ წრეზე. ეს ხდებოდა 2009 წელს, ეს ხდებოდა ადრეც და მე, ბუნებრივია, მაქვს ვალდებულება იმ ადამიანების მიმართ, ვინც ამირჩია“- განაცხადა ქევხიშვილმა.

ქევხიშვილის თქმით, ფედერაციაში განხეთქილება უმრავლესობის დეპუტატის, ყოფილი ძიუდოისტის, შოთა ხაბარელის ინტერესებშია.

„ეს არის მართული პროცესი, თუმცა ის ადამიანები, რომლებიც ამის უკან დგანან და როგორც მინიმუმ სურვილი აქვთ პროცესების ესკალაციის, იგივე ხაბარელი, რომელიც გამოდის და ძალიან მწვავე განცხადებებს აკეთებს, იგივე ზვიადაური. მათ არგუმენტირებულად საუბარი არ სურთ. ხაბარელი არის სიტუაციის ერთ-ერთი გამამწვავებელი, ესკალაციის მიმცემი, როდესაც ცეცხლზე ნავთს ასხამს, გამომდინარე იქიდან, რომ ის ფიქრობს, შესაძლებელია თვითონაც რამეს გამორჩეს და სარგებელი მიიღოს.“- განაცხადა ქევხიშვილმა გუშინ „იმედის“ ეთერში.

პარლამენტის სპორტისა და ახალგაზრდულ საქმეთა კომიტეტის თავმჯდომარის პირველი მოადგილე შოთა ხაბარელი ფიქრობს, რომ ძიუდოს ფედერაციის პრეზიდენტი დავით ქევხიშვილი უნდა გადადეს. მისი მოსაზრებით, ამასთან დაკავშირებით ძიუდოისტებს მყარი არგუმენტები აქვთ. მისი თქმით 2012-2016 წლებში მოხდა ძიუდოს აღზევება და ფედერაციის პრეზიდენტ ქევხიშვილს კვალიფიციური მწვრთნელები სამსახურიდან არ უნდა გაეშვა.

„ეს საკითხი რაც შეიძლება სწრაფად უნდა გადაწყდეს და საკითხს საღი აზრით უნდა მოუდგეს პრეზიდებტიც იმიტომ, რომ ის არის ერთი, აქეთ კი ნაკრებია", - განაცხადა შოთა ხაბარელმა.

ძიუდოისტების პროტესტი დღეს მთავრობის ადმინისტრაციასთან გადაინაცვლებს. სპორტსმენები აქციის გამართვა 17:00 საათისთვის აპირებენ.