"უმუშევრობის ზრდა “ქართული ოცნების” პოლიტიკის შედეგია, ივანიშვილის მთავრობა მხოლოდ საკუთარ კეთილდღეობაზე ზრუნავს"

"უმუშევრობის ზრდა “ქართული ოცნების” პოლიტიკის შედეგია, ივანიშვილის მთავრობა მხოლოდ საკუთარ კეთილდღეობაზე ზრუნავს" - ჭიაბერაშვილი

პოლიტიკა - 13:51, 21 May, 2018

661

“ევროპული საქართველოს” წევრი ზურაბ ჭიაბერაშვილი საქსტატის მიერ დღეს გამოქვეყნებულ შედეგებს ეხმაურება, სადაც აღნიშნულია, რომ თბილისში, რომელზეც ეკონომიკური აქტივობის თითქმის 2/3 მოდის, უმუშევრობა 2017 წელს 2016 წელთან შედარებით გაზრდილია.

"2018 წლის პირველ კვარტალში უმუშევრობა 14%-მდე გაიზარდა. 2017 წელს ეს მონაცემი 13.9% იყო. უმუშევრობის ზრდა “ქართული ოცნების” არასწორი ეკონომიკური პოლიტიკის შედეგია” - აღნიშნა ჭიაბერაშვილმა.

ჭიაბერაშვილის თქმით, უმუშევრობის შემცირება შესაძლებელია მხოლოდ მთავრობის ზომის შემცირებით, როდესაც მთავრობა დაბლა სწევს გადასახადებს, მეტ ფულს უტოვებს ბიზნესს, აძლევს მას გაფართოებისა და დამატებით ხალხის სამსახურში აყვანის საშუალებას. ამის ნაცვლად, მთავრობა ვერ ელევა საკუთარ კეთილდღეობას, მეტ ფულს იღებს ბიზნესიდან, ფლანგავს საბიუჯეტო თანხებს და ამით პირდაპირ ურტყამს ათასობით მოქალაქისა და ოჯახის შემოსავლებს.

“წელიწადზე მეტია, “ევროპული საქართველო” მთავრობას მცირე და საშუალო ბიზნესის მხარდაჭერის ფართომასშტაბიან საკანონმდებლო პაკეტს სთავაზობს, რომელიც ეკონომიკური ზრდის დაჩქარებაზე, უმუშევრობის შემცირებაზე, ფასების დასტაბილურებასა და მოქალაქეთა შემოსავლების ზრდაზეა ორიენტირებული. სამწუხაროდ, ბიძინა ივანიშვილის მთავრობა მხოლოდ საკუთარ კეთილდღეობაზე ზრუნავს და საერთოდ არ აინტერესებს ხალხის მდგომარეობა,” - აცხადებს “ევროპული საქართველოს” წევრი ზურაბ ჭიაბერაშვილი.