ტატუნაშვილის ოჯახმა შესაძლოა სტრასბურგში სარჩელი რუსეთთან ერთად, საქართველოს წინააღმდეგაც შეიტანოს

პოლიტიკა - 12:40, 21 May, 2018

1911

საოკუპაციო რეჟიმის მიერ მოკლული არჩილ ტატუნაშვილის ოჯახმა შესაძლოა ევროპულ სასამართლოში საქართველოს წნააღმდეგაც შეიტანოს სარჩელი. ამის შესახებ განცხადება ტატუნაშვილების ადვოკატმა, თამარ ავალიანმა პრეზიდენტის სასახლეში გააკეთა, სადაც ტატუნაშვილი გიორგი მარგველაშვილმა ღირსებს ორდენით დააჯილდოვა.

ადვოკატის განცხადებით, ეს იმ შემთხვევაში მოხდება, თუ გამოძიება არაფექტურად წარიმართება.

ადვოკატმა ჟურნალისტებთან რუსეთის ფედერაციის წინააღმდეგ შეტანილ სარჩელზეც ისაუბრა:

”ჩვენ ვფიქრობთ, რომ რუსეთის ფედერაციასთან უნდა გვქონოდა კომუნიკაცია. ჩვენ მოვთხოვეთ გამოძიების დაწყება. ველით რუსეთის ფედერაციისგან პასუხს. რასაკვირველია, დიდი იმედები ამასთან დაკავშირებით არ გვაქვს.

ეს გვჭირდება იმისთვის, რომ ამოვწუროთ შიდასახელმწიფოებრივი მექანიზმები და ადამიანის უფლებათა ევროპულ სასამართლოს მივმართოთ რუსეთის ფედერაციის წინააღმდეგ.

რაც შეეხება საქართველოს წინააღმდეგ მიმართვას, ჩვენ დავაკვირდებით საქართველოში მიმდინარე გამოძიებას. ჩვენი მიზანი არ არის, რომ საქართველოს, ასე ვთქვათ, ვუჩივლოთ ადამიანის უფლებათა ევროპულ სასამართლოში, მაგრამ თუ ჩვენ დავინახავთ, რომ გამოძიება აქ არაეფექტურად მიმდინარეობს და სათანადო გულმოდგინებით არ მიმდინარეობს გამოძიების პროცესი, იძულებულნი ვიქნებით, რომ შევიტანოთ როგორც რუსეთის ფედერაციის, ისე საქართველოს წინააღმდეგ", - აღნიშნა თამარ ავალიანმა.