შოთა შალელაშვილი მიიჩნევს, რომ რუსეთის პრეზიდენტთან დიალოგი პრემიერმა კვირიკაშვილმა უნდა აწარმოოს

პოლიტიკა - 16:20, 19 May, 2018

1439

რუსეთის ხელისუფლებასთან დიალოგის დაწყების საკითხს სოციალურ ქსელში ეხმაურება უმრავლესობის დეპუტატი შოთა შალელაშვილი, რომელიც მიიჩნევს, რომ პრეზიდენტის მხირდან საუბრები ,,ვიწრო პოლიტიკურ“ ინტერესებს ემსახურება, ხოლო სხვადასხვა პოლიტიკური წრეების მხრიდან ამაზე საუბრები ზიანის მომტანია, რადგან მათ არ გააჩნიათ ლეგიტიმაცია, აწარმოონ ამ სახის მოლაპარაკებები.

შალელაშვილი მიიჩნევს, რომ ასეთი დიალოგის უფლებამოსილება მხოლოდ საქართველოს პრემმიერ-მინისტრს გააჩნია.

„რუსეთთან დიალოგის დაწყებასთან დაკავშირებით ბოლოდროს გააქტიურებულ მცდელობას მეტი პასუხისმგებლობა სჭირდება. დაუშვებლად მიმაჩნია ნებისმიერ პოლიტიკური ძალის, მათ შორის თავად პრეზიდენტის მხრიდან ვიწრო პოლიტიკური თუ წინასაარჩევნო მიზნებისთვის თემის არასერიოზულად აქტუალიზება. სხვა და სხვა პოლიტიკური წრიდან ისმის შეთავაზებები, თუმცა მათ არ გააჩნიათ ლეგიტიმაცია, რათა აწარმოონ შედეგიანი მოლაპარაკებები, უფრო მეტიც, ვაკვირდები და ხშირად, თავიანთი მოსაზრების საჯაროდ დაფიქსირებით, ზიანი ადგება ქვეყნის ინტერესებს და მოლაპარაკებების სამომავლო პერსპექტივებს, რადგანაც საუბრობენ იმ თემებზე, რაც უნდა იყოს განხილული მოლაპარაკებების მაგიდასთან. საკითხის ფართო მნიშვნელობიდან და მასშტაბურობიდან გამომდინარე მოლაპარაკებების და დიალოგის უფლებამოსილება გააჩნია ჩვენი ხალხის უმრავლესობის მიერ მაღალი ნდობის მანდატის მქონე ძალას და მის უფლებამოსილ პირს - საქართველოს პრემიერ-მინისტრს. უნდა გავაცნობიეროთ და სწორი შეფასებაც მივცეთ, რომ ლეგიტიმაციის მიღმა დარჩენილი ნებისმიერი პოლიტიკური სუბიექტის ქმედებები ხელ-ფეხს უკრავს პერსპექტივებს და უფრო ართულებს ამ პრობლემას. მე კვლავ ვაფიქსირებ ჩემს ურყევ პოზიციას და დამოკიდებულებას, ვფიქრობ, რაც უფრო ადრე შედგება ეფექტური და სოლიდური მოლაპარაკებები სახელმწიფოების დონეზე, მით უკეთესი იქნება ჩვენთვის, წინააღმდეგ შემთხვევაში კი, ჩვენ აუცილებლად მოგვიწევს უფრო მაღალი ფასის გადახდა.“ - წერს შალელაშვილი.