შინაგან საქმეთა მინისტრმა პარლამენტში გამოსვლისას, 12 და 13 მაისს პოლიციის ქმედებებთან დაკავშირებით, დეპუტატების შეკითხვებს უპასუხა. მისი თქმით, მძიმე წარსული გამოცდილებიდან გამომდინარე პოლიციის დიდი მოცულობით ქუჩაში გამოჩენის მიმართ საზოგადოებაში დიდი რეზისტენტულობა არსებობს. როგორც გახარიამ განაცხადა 12 მაისს პოლიცია ასრულებდა სპეციალურ ღონისძიებას, 13 მაისს პოლიცია იცავდა გამოხატვის თავისუფლებას და ზრუნავდა თავის მოქალაქეებზე:

„ამ მოვლენების შემდეგ როდესაც ჩვენ ანალიზი მოვახდინეთ, ჩვენთვის გასაგები იყო ეს რატომ მოხდა. საზოგადოებაში მართლაც არსებობს დიდი რეზისტენტულობა, როგორც კი სამართალდამცავი ორგანო, ლეგიტიმურად თუ არალეგიტიმურად დიდი მოცულობით ჩნდება ქუჩაში და იწყებს სამართლის აღსრულებას. გამოცდილებას 9 აპრილიდან დაწყებული 26 მაისით დამთავრებული დიდი ენერგია აქვს და ეს არის ჩვენი მძიმე წარსული, რომლის გამოსწორების საშუალებაც ახლა გვაქვს, იმ ახალგაზრდებთან, იმ ჰიპსტერებთან ერთად, რომლებიც რაღაც მომენტებში ტაშს უკრავდნენ პოლიციის თანამშრომლებს, რამეთუ მათ იგრძნეს ერთი რამ, 12 მაისს პოლიცია ასრულებდა სპეციალურ ღონისძიებას, 13 მაისს პოლიცია იცავდა გამოხატვის თავისუფლებას და ზრუნავდა თავის მოქალაქეებზე. ეს იყო დიდი განსხვავება და ეს განსხვავება თქვენ რომ შეხედოთ კადრებს ძალიან კარგად დაინახავთ.“- განაცხადა გახარიამ.

კითხვაზე, რატომ არ მოხდა 13 მაისს კონტრაქციის დაშლა, რომლის წარმომადგენლებიც საკმაოდ აგრესიულად იქცეოდნენ, მინისტრმა განაცხადა, რომ შსს შეეცადა 17 მაისის წინა დღეებში რადიკალიზაციის თავიდან აეცილებინა:

„ეს რომ არ ყოფილიყო 13-14 მაისი, ცოტა სხვანაირად მოვიქცეოდით, უბრალოდ კარზე გვედგა 17 მაისი, რომელიც არ არის მარტო მთავრობის გამოწვევა. ჩვენი ყველას გამოწვევაა. გუშინ მაგალითად, ჩვენ რაღაცნაირად შევძელით, რომ ეს გამოხატვის თავისუფლება დაგვეცვა თქვენთან ერთად, იძულებული ვიყავით, იმიტომ, რომ ჩვენს საზოგადოებაში, საკმაოდ კონსერვატიულ საზოგადოებაში, ასევე გამოხატვის თავისუფლების ცოტა უფრო აგრესიული ფორმები, ერთდროულად დაგვებალანსებინა, რისი სამართლებრივი უფლებაც პოლიციას გააჩნია და არცერთ შემთხვევაში პოლიციის მხრიდან გადაცდომას და უფლებამოსილების გადამეტებას ადგილი არ ჰქონია. იქ სადაც ადგილი ქონდა პოლიციის მხრიდან დაუმორჩილებლობას, რა თქმა უნდა პოლიცია მაშინვე შედიოდა მანდატში.“- განაცხადა გახარიამ.