პრეზიდენტის გამონათქვამმა უარყოფითი შედეგი უკვე გამოიღო და რუსეთს მივეცით საბაბი, წარმოჩენილიყო მშვიდობისმყოფელად- გოცირიძე

პოლიტიკა - 15:33, 18 May, 2018

984

რუსეთის პრეზიდენტთან შეხვედრის შესაძლებლობებთან დაკავშირებით პრეზიდენტის მიერ გაკეთებულ განცხადებას „ერთიანი ნაციონალური მოძრაობის“ წევრი რომან გოცირიძე გამოეხმაურა. გოცირიძის თქმით, პრეზიდენტის ნათქვამმა თავისი პირველი, უარყოფითი შედეგი უკვე გამოიღო და მარგველაშვილის ინიციატივაზე რუსეთის საგარეო საქმეთა მინისტრის მოადგილის პასუხით ოკუპანტი მხარე მშვიდობისმყოფელად გამოჩნდა:

„პრეზიდენტის ამ თავისუფალმა გამონათქვამმა, ეს განცხადებაც არ იყო, თავისი პირველი, უარყოფითი შედეგი უკვე გამოიღო და რუსეთს მივეცით იმის საბაბი, რომ ის წარმოჩენილიყო მშვიდობისმყოფელად, კონსტრუქციულ მხარედ, მოლაპარაკების მსურველად და თითქოსდა, ეს მოლაპარაკება შესაძლებელი ყოფილიყოს საქართველოსთან რაიმე რეალური შედეგის დადგომის გარეშე. ჩვენ ვიცით, რომ დღეს არავითარი შანსი არ არსებობს მოლაპარაკებით რაიმე ისეთი შედეგის მიღებისა, რომელიც იქნებოდა ქვეყნისთვის სასარგებლო ან ისეთი, რომელიც წაიყვანდა რუსეთს სერიოზული დათმობისკენ. ეს საუბარი ფაქტობრივად, ასხამს რუსეთის წისქვილზე წყალს.“ - განაცხადა რომან გოცირიძემ.

გიორგი მარგველაშვილმა პუტინთან შეხვედრის შესახებ ინიციატივაზე ორი დღის წინ სტუდენტებთან გამართულ შეხვედრაზე ისაუბრა.