"შეხვედრა შეხვედრისთვის არ უნდა შედგეს" - ქაცარავა პუტინსა და მარგველაშვილს შესაძლო შეხვედრაზე

პოლიტიკა - 15:06, 18 May, 2018

982

პარლამენტის საგარეო ურთიერთობათა კომიტეტის თავმჯდომარე სოფო ქაცარავა, რუსეთის საგარეო საქმეთა მინისტრის მოადგილის მიერ გაკეთებულ იმ განცხადებას ეხმაურება, რომელიც რუსეთის და საქართველოს პრეზიდენტების შესაძლო შეხვედრას ეხება.

ქაცარავას თქმით, შეხვედრა საქართველოს და რუსეთის პრეზიდენტებს შორის შესაძლებელია მხოლოდ მაშინ, როდესაც ამ შეხვედრას ექნება კონკრეტული მიზანი.

„ეს კონკრეტული მიზანი არის, რა თქმა უნდა, ტერიტორიულ მთლიანობასთან დაკავშირებული საკითხები და თუ გადაიდგმება მცირე ნაბიჯი იმისკენ, რომ ეს პრობლემა მოგვარდეს. სხვა შემთხვევაში, ჩვენ ვერ ვხედავთ, შეხვედრა შეხვედრისთვის არ უნდა შედგეს, შესაბამისად, ამ ეტაპზე, სხვა კომენტარს ვერ გავაკეთებ, რადგან წინაპირობა ამისთვის, ჯერჯერობით, არ არსებობს,“ - განაცხადა ქაცარავამ.

მოსკოვი, რუსეთისა და საქართველოს პრეზიდენტების შეხვედრას არ გამორიცხავს.

ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა ისაუბრა.

„თეორიულად, ასეთი შეხვედრა ყველა დონეზეა შესაძლებელი, მათ შორის უმაღლეს დონეზე, თუმცა ამას სათანადო მომზადება სჭირდება“ - განაცხადა კარასინმა.

საქართველოს პრეზიდენტმა სამედიცინო უნივერსიტეტში სტუდენტებთან შეხვედრაზე, რომელიც საქართველოს პირველი რესპუბლიკის 100 წლისთავს ეძღვნებოდა, საქართველო-რუსეთის ურთიერთობასა და ოკუპაციასთან დაკავშირებით სტუდენტების შეკითხვებს უპასუხა. გიორგი მარგველაშვილის თქმით, რუსეთს კეთილმეზობლობას სთავაზობთ იმ წუთიდან, რა წუთშიც დაბრუნდება ოკუპირებული ტერიტორიები.