საბანკო სესხების გამკაცრება - ,,საშუალო და გრძელვადიან პერიოდში აუცილებლად დადებითი შედეგი ექნება"

პოლიტიკა - 14:18, 18 May, 2018

1012

საქართველოს ეროვნული ბანკის პრეზიდენტის კობა გვენეტაძის თქმით, სესხების შემოსავლების დადასტურების შედეგად გაცემა აბსოლუტურად ჯანსაღი პრინციპია და ეს აუცილებლად იქნება იმის საფუძველი, რომ საბანკო სისტემა და ზოგადად, ფინანსური ინსტიტუტები კიდევ უფრო გაჯანსაღდეს. სებ-ის პრეზიდენტის განცხადებით, საბანკო რეგულაციებმა მოკლევადიან პერიოდში, შესაძლოა, გარკვეული გავლენა იქონიოს სააბნკო განვადებებზე , თუმცა საშუალო და გრძელვადიან პერიოდში აუცილებლად დადებითი შედეგი ექნება.

„ეს არ არის რეგულაცია, ეს არის ის დროებითი წესი, რომელიც ამოქმედდა, რომელიც შემოსავლის შეფასების გარეშე სესხების გაცემის ლიმიტს გულისხმობს, კაპიტალის 25%-თან დაკავშირებით. მიდგომა არის ასეთი, რომ სესხის გაცემა უნდა მოხდეს მხოლოდ იმ შემთხვევაში, როდესაც მსესხებლის შემოსავლის შეფასება მოხდება. ეს არის აბსოლუტურად ჯანმრთელი პრინციპი. რაც შეეხება გავლენას, შესაძლებელია, ამას მოკლევადიან პერიოდში გარკვეული გავლენა ჰქონდეს. საშუალო და გრძელვადიან პერიოდში აუცილებლად დადებითი შედეგი ექნება. პასუხისმგებლიანი დაფინანსების პრინციპებიდან გამომდინარე, ეს არის აბსოლუტურად ბუნებრივი მოვლენა. სესხების გაცემა უნდა მოხდეს მსესხებლის შემოსავლების შეფასების და დადასტურების შემთხვევაში“- განაცხადა გვენეტაძემ.

შეგახენებთ, ეროვნული ბანკის რეგულაციები სესხის გაცემასთან დაკავშირებით ძალაში 7 მაისიდან შევიდა, რომლის მიხედვითაც კომერციულ ბანკებს კლიენტის გადახდისუნარიანობის, მისი შემოსავლებისა და ხარჯების დეტალური ანალიზის გარეშე, სესხის გაცემა აეკრძალათ.