რომან გოცირიძე პარლამენტის რეგლამენტში ცვლილებების შეტანას ითხოვს

პოლიტიკა - 13:59, 17 May, 2018

839

საპარლამენტო ფრაქციის - „ერთიანი ნაციონალური მოძრაობა" - თავმჯდომარე რომან გოცირიძე ითხოვს „საქართველოს პარლამენტის რეგლამენტში“ (საქართველოს საკანონმდებლო მაცნე, №47, 28.12.2009, მუხ. 361) შეტანილ იქნას შემდეგი სახის ცვლილება: 205-ე მუხლის პირველი ნაწილი ჩამოყალიბდეს შემდეგი რედაქციით: საქართველოს პრემიერ-მინისტრი ვალდებულია, პარლამენტს წელიწადში ორჯერ, საშემოდგომო და საგაზაფხულო სესიების პლენარული სხდომების პირველივე კვირაში წარუდგინოს ანგარიში სამთავრობო პროგრამის შესრულების მიმდინარეობის შესახებ.

"რეგლამენტის პროექტის მიღების მიზეზია საქართველოს პარლამენტის რეგლამენტით გათვალისწინებული საპარლამენტო კონტროლის განხორციელების გაძლიერება.

პროექტის მიღების მიზანს წარმოადგენს საპარლამენტო ზედამხედველობის გაძლიერება. კერძოდ, საქართველოს პარლამენტის რეგლამენტით განსაზღვრული სამთავრობო პროგრამების მიმდინარეობის შესახებ საქართველოს პარლამენტისათვის პრემიერ-მინისტრის მიერ ანგარიშის წარდენის ვალდებულების სიხშირის ზრდა.

რეგლამენტის პროექტი არ ახდენს გავლენას სახელმწიფო ბიუჯეტის საშემოსავლო ნაწილზე.

მისი მიღება კი არ ეწინააღმდეგება ევროკავშირის დირექტივებს’’ - განაცხადა რომან გოცირიძემ.