IDAHOTB - აღინიშნება თუ არა 17 მაისი, "თანასწორობის მოძრაობაში“ შეთანხმების მიღწევა ვერ მოხერხდა

პოლიტიკა - 21:27, 16 May, 2018

1108

ჰომოფობიასთან, ტრანსფობიასა და ბიფობიასთან ბრძოლის საერთაშორისო დღის აღნიშვნის საკითხი კვლავ გაურკვეველია, აქტივისტებმა, რომლებიც IDAHOTB-ს აღნიშვნასთან დაკავშირებით „თანასწორობის მოძრაობის“ ოფისში 11 საათის განმავლობაში მსჯელობდნენ შეთანხმებას ვერ მიაღწიეს.

არასამთავრობო ორგანიზაცია „თანასწორობის მოძრაობის“ აღმასრულებელი დირექტორის ლევან ბერიანიძის თქმით, მწვავე დისკუსიის მიუხედავად ჯერ გადაწყვეტილება მიღებული არ არის. მისივე თქმით, ხვალ დილით გაკეთდება განცხადება, რის შემდეგაც გაირკვევა შეიკრიბებიან თუ არა ლგბტ თემის მხარდამჭერ აქციაზე, შეხვედრის დღევანდელი მონაწილეები.

აღნიშნულ საკითხზე აზრი ორად არის გაყოფილი. ერთი ნაწილი თვლის, რომ ხვალინდელი აქციის უსაფრთხოება შესაძლოა არ იყოს დაცული და ე.წ მარშელების და ნეონაცისტური ორგანიზაციების მიერ თავდასხმა განხორციელდეს. ხოლო მეორე ნაწილს მიაჩნია, რომ მიუხედავად შესაძლო საფრთხისა, აქცია მაინც უნდა ჩატარდეს.

შეგახსენებთ, 17 მაისს თბილისში რამდენიმე ღონისძიებაა დაგეგმილი, საქართველოში უკვე მეშვიდედ ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე აღინიშნება, ამასთანავე საპატრიარქო ოჯახის სიწმინდის დღეს აღნიშნავს და რუსთაველზე მსვლელობის მოწყობას აპირებს.

IDAHOTB-ს აღნიშვნას 2012-2013 წლებში დაპირისპირება მოჰყვა, ადამიანის უფლებების დაცვისთვის გამოსულ მოქალაქეებს, "ქართული ტრადიციების დაცვის მოტივით" მოქალაქეთა მრავალრიცხოვანი ჯგუფი დაუპირისპირდა, რომელთა რიგებში სასულიერო პირებიც იყვნენ. ადგილი ქონდა ფიზიკურ დაპირისპირებას. IDAHOTB-ს აღნიშვნისთვის გამოსული აქტივისტები ტერიტორიიდან პოლიციამ სპეციალური ტრანსპორტით გაიყვანა.