პატრული "თანასწორობის მოძრაობის" ოფისთან - აქტივისტები 17 მაისის აქციის შესახებ უკვე რამდენიმე საათია მსჯელობენ

პოლიტიკა - 19:36, 16 May, 2018

1295

"თანასწორობის მოძრაობის" ოფისთან საპატრულო პოლიცია იყო მობილიზებული. რუსთავი2-ის ინფორმაციით, სამართალდამცავების გამოძახება სავარაუდოდ მას შემდეგ გახდა საჭირო, რაც 17 მაისის აქციის ჩატარებასთან დაკავშირებით მწვავე შელაპარაკებას ქონდა ადგილი. შეხვედრა დატოვა რამდენიმე მონაწილემ, მათ შორის ანა სუბელიანმა და ლევან ბერიანიძემ, თუმცა მათ ამის მიზეზებზე არ უსაუბრიათ და არც აქციის შესახებ გაუკეთებიათ კომენტარი.

მხარეებმა უნდა გადაწყვიტონ გაიმართება თუ არა ხვალ აქცია მთავრობის ადმინისტრაციასთან. აღნიშნულ საკითხზე აზრი ორად არის გაყოფილი. ერთი ნაწილი თვლის, რომ ხვალინდელი აქციის უსაფრთხოება შესაძლოა არ იყოს დაცული და ე.წ მარშელების და ნეონაცისტური ორგანიზაციების მიერ თავდასხმა განხორციელდეს. ხოლო მეორე ნაწილს მიაჩნია, რომ მიუხედავად შესაძლო საფრთხისა, აქცია მაინც უნდა ჩატარდეს.

შეგახსენებთ, 17 მაისს თბილისში რამდენიმე ღონისძიებაა დაგეგმილი, საქართველოში უკვე მეშვიდედ ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე აღინიშნება, ამასთანავე საპატრიარქო ოჯახის სიწმინდის დღეს აღნიშნავს და რუსთაველზე მსვლელობის მოწყობას აპირებს.

IDAHOTB-ს აღნიშვნას 2012-2013 წლებში დაპირისპირება მოჰყვა, ადამიანის უფლებების დაცვისთვის გამოსულ მოქალაქეებს, "ქართული ტრადიციების დაცვის მოტივით" მოქალაქეთა მრავალრიცხოვანი ჯგუფი დაუპირისპირდა, რომელთა რიგებში სასულიერო პირებიც იყვნენ. ადგილი ქონდა ფიზიკურ დაპირისპირებას. IDAHOTB-ს აღნიშვნისთვის გამოსული აქტივისტები ტერიტორიიდან პოლიციამ სპეციალური ტრანსპორტით გაიყვანა.