ძიუდოს საკითხების შესასწავლად შექმნილმა კომისიამ , რომლის შემადგენობაშიც კულტურისა და სპორტის უწყების, პარლამენტის და ოლიმპიური კომიტეტის წარმომადგენლები შედიან ძიუდოს ფედერაციაში დარღვევები ამ ეტაპზე ვერ აღმოაჩინა.

გუშინდელ შეხვედრაზე კომისიის შეკითხვებს ფედერაციის პრეზიდენტმა დავით ქევხიშვილმა უპასუხა.

მინისტრის შეფასებით, ფედერაციის პრეზიდენტისგან წარმოდგენილი არგუმენტები საკმაოდ მყარი იყო. შემდეგი რაუნდი უკვე სპორტსმენებთან იგეგმება.

„დღეს ჩვენ დარღვევის ვერანაირ ნიშნებზე ვერ ვისაუბრებთ, პირდაპირ უნდა ვთქვა, რომ საკმაოდ არგუმენტირებულად და დასაბუთებულად ჟღერდა ყველა ის პასუხი, რომელზეც ფედერაცია საუბრობდა.“- განაცხადა მიხეილ გიორგაძემ.

სპორტსმენების შეკითხვებზე პასუხის გაცემისთვის მზადყოფნას აცხადებს ფედერაციის პრეზიდენტი:

“ფაქტია, რომ ზოგადად პრობლემა არსებობს, თვითონ ეს რაც მოხდა- დაძაბულობა. მე იმედს გამოვთქვამ, რომ ეს კომისიაც თავის როლს შეასრულებს. ბიჭებთან მიმართებაში მე მინდა ხაზი გავუსვა იმას, რომ მზად ვარ , მათთან ერთად დავჯდე და გავიარო ნებისმიერი საკითხი.“- განაცხადა დავით ქევხიშვილმა.

შეგახსნებთ, საქართველოს ძიუდოს ნაკრების წევრთა უმრავლესობა, ფედერაციის პრეზიდენტის გადადგომას ითხოვს, მათი თქმით, ქართულ ძიუდოში შექმნილი სავალალო ვითარება სწორედ დავით ქევხიშვილის არასათანადო მუშაობის შედეგია, მათი თქმით არასათანადოდ იხარჯება სპორტის ამ სახეობისთვის გამოყოფილი თანხებიც. პროტესტის ნიშნად ძიუდოისტები ტურნირებში არ მონაწილეობენ და არც ვარჯიშობენ.