რუსეთის საპატრიარქო საქართველოში თავის წარმომადგენელს აგზავნის. ინფორმაციას ამის შესახებ რუსეთის საპატრიარქო ოფიციალურ ვებგვერდზე ავრცელებს. როგორც განცხადებაშია აღნიშნული, გადაწყვეტილება რუსული მართლმადიდებელი ეკლესიის სინოდის სხდომაზე ორი დღის წინ იქნა მიღებული, რომლის თანახმადაც, ქართულ ეკლესიასთან შეთანხმებულია, რომ მოსკოვის დეკანოზი ვლადიმერ ალექსანდროვი თბილისში, იოანე ღვთისმეტყველის სახელობის ტაძარში რუსულენოვანი მრევლისთვის იმსახურებს. აუცილებელობის შემთხვევაში, მას დაევალება რუსული მართლმადიდებელი ეკლესიის პოზიცია წარმოადგინოს.

როგორც „ნიუპოსტთან“ საუბრისას საქართველოს კათოლიკოს-პატრიარქის მდივანი მამა მიქაელ ბოტკოველი აცხადებს, მსგავსი პრაქტიკა ორი ქვეყნის ეკლესიებს შორის ათწლეულების მანძილზე ასრულებს და ამაში ახალი არაფერია:

„ჩვეულებრივ, ისე, როგორც ყოველთვის, მათ ჰყავდათ საქართველოში რუსულენოვანი მრევლისთვის სასულიერო პირი გამოგზავნილი, ისე, როგორც ჩვენ გვყავს იქ ჩვენი წარმომადგენელი. ეს ეკლესიებს შორის შეთანხმებაა წლების განმავლობაში, ახალი ამბავი არ არის, ათწლეულებია ასეა, მათაც ჰყავთ ყოველთვის აქ წარმომადგენელი და ჩვენც გვყავს იქ წარმომადგენელი.

თუ სასულიერო პირის ჩამოსვლა აქ რუსული ეკლესიის გავლენებს გააძლიერებს, ჩვენსას რატომ არ გააძლიერებს იქ? ჩვენც ხომ გავაგზავნეთ მღვდელმსახური? თუ ისინი გაძლიერდებიან, ჩვენ რატომ დავსუსტდებით? ის იქნება იმ კონკრეტულ ტაძარში, რომელიც დააკმაყოფილებს რუსულენოვანი მრევლის მოთხოვნილებებს, სხვა არაფერი განსაკუთრებული ფუნქციები არ ექნება“, - აღნიშნავს სასულიერო პირი.

მამა მიქაელ ბოტკოველის განცხადებით, აღნიშნულ საკითხზე საქართველოს საპატრიარქოში მსჯელობა არ ყოფილა:

„რატომ უნდა ყოფილიყო საქართველოს საპატრიარქოში ამასთან დაკავშირებით მსჯელობა, როდესაც ყოველთვის იყო ასეთი პრაქტიკა ეკლესიებს შორის, არასდროს ეს საკითხი ასეთი სიმწვავით არ დასმულა. მე ვიცი თქვენი ეს გამოძახილი საიდან მოდის, თეოლოგების ნაწილმა სკეპტიკურად შეაფასა ეს ფაქტი, ან არის ინფორმაციის ნაკლებობა, ან მიზანმიმართულად, დესტრუქციულად მოქმედებენ ისინი, რომ საზოგადოება შეცდომაში შეიყვანონ. იყო ეს პრაქტიკა, დღეს ხომ არ დაიწყო? რატომ გახდა დღეს სასულიერო პისი გამოგზავნა ასეთი აქტუალური, წარმოდგენა არ მაქვს“, - აცხადებს მამა მიქაელ ბოტკოველი.