ოკუპირებული ცხინვალის მოსაზღვრე სოფელ ერგნეთში ინციდენტების პრევენციისა და მათზე რეაგირების მექანიზმის ფარგლებში მორიგი შეხვედრა მიმდინარეობს. „ნიუპოსტის“ კორესპონდნეტის ცნობით, შეხვედრაზე განხილვის მთავარი თემა არჩილ ტატუნაშვილის საქმე იქნება. შსს-ს ანალიტიკური დეპარტამენტის ხელმძღვანელის, კახა ქემოკლიძის განცხადებით დააყენებენ დავით ბაშარულის საქმის გამოძიების აუცილებლობის საკითხსაც.

„ცხადია, ერთ-ერთი ყველაზე მნიშვნელოვანი საკითხი ინება არჩილ ტატუნაშვილის საქმე. ცენტრალური ხელისუფლების პრინციპული პოზიციაა, რომ უნდა მოხდეს ამ საქმის სიღრმისეული და გამჭვირვალე გამოძიება და გამოვლენილნი იქნენ დამნაშავეები. ამ მიმართულებით დღევანდელ შეხვედრაზე აქტიური დისკუსია გვექნება. ასევე ვისაუბრებთ, ბაშარულის საქმის დეტალებთან დაკავშირებით, იქიდან გამომდინარე რომ თავის დროზე არ მოხდა დავით ბაშარულის საქმის სიღრმისეული და გამჭვირვალე გამოძიება და ის კითხვები რომელიც ამ საქმეში ყოველთვის არსებობდა, ჩვენ მივიღეთ ოკუპირებულ ახალგორში ტატუნაშვილის რთული და კომპლექსური საქმე,“-განაცხადა კახა ქემოკლიძემ.

დღევანდელ შეხვედრაზე ცნობილი გახდა, რომ ოკუპირებული ცხინვალის რეგიონის წარმომადგენელი შეხვედრებზე შეიცვალა. აქამდე ოკუპირებულ ცხინვალს მურატ ჯიეოვი წარადგენდა, დღეიდან კი ეგორ კოჩიევი ჩაერთვება მოლაპარაკებებში. შეხვედრაზე სულ 17 საკითხს განიხილავენ. მათ შორის არის საქართველოს მოქალაქეთა უკანონო დაკავების ფაქტები და ე.წ. საზღვართან ხნულების გავლების პროცესი.