"თუ შევატყვეთ, რომ თანამშრომლობამ არ გაამართლა, გადავინაცვლებთ ისევ პროტესტის ფორმატში"- ბექა წიქარიშვილი

პოლიტიკა - 15:08, 14 May, 2018

5036

"თეთრი ხმაურის მოძრაობის" ლიდერის, ბექა წიქარიშვილის თქმით თუ 12 მაისის სპეცოპერაციისსას ძალის გადამეტების საკითხის გამოძიებაზე და ნარკოპოლიტიკის საკითხებთან დაკავშირებით შსს-სთან თანამშრომლობის ფორმატმა არ გაამართლა, მოძრაობა ისე პროტესტის ფორმატში გადაინაცვლებს, ამის შესახებ ბექა წიქარიშვილმა განცხადება შს მინისტრ გიორგი გახარიასთან შეხვედრის შემდეგ განაცხადა:

„ჩვენთვის პრინციპულია საზოგადოებრივი ლეგიტიმაცია. ჩვენ ვართ საზოგადოებრივი მოძრაობის წევრები. ჩვენთვის პრინციპული საკითხი იყო ფორმატის განსაზღვრაზე აგვეღო ინიციატივა, ამაზე მინისტრი დაგვთანხმდა. ეს იქნება უფრო წარმომადგენლობითი, წარმოდგენილი იქნებიან ის ადამიანები, ვინც გუშინ, ამ დღეების განმავლობაში იბრძოდა ჩვენთან ერთად სიმართლისთვის. ეს ვერ იქნება ფართომასშტაბიანი, თუმცა თითო წარმომადგენელი იქნება. გუშინ ცაიტნოტში მოგვიწია მოქმედებები, საკმაოდ დაძაბული იყო ვითარება, როცა დაგვიძახეს, მოსალაპარაკებლად და იმ მომენტში ვერ მოხერხდა მაქსიმალური უზრუნველყოფა. მე ვეთანხმები პროტესტის დროებით შეჩერების პროცესს, პროტესტი ძალაში რჩება. თუ შევატყვეთ, რომ თანამშრომლობის ფორმატმა არ გაამართლა, გადავინაცვლებთ ისევ პროტესტის ფორმატში.“ – განაცხადა წიქარიშვილმა.

შეგახსენებთ, 12 მაისს თბილისის რამდენიმე ღამის კლუბში ნარკორეალიზატორებთან ბრძოლის მოტივით სპეცრაზმი შევიდა. რასაც კლუბებიდან ხალხის ძალით გამოყვანა და დაკავება მოჰყვა. შსს-ს ქმედებებმა თბილისის ცენტრში მრავალრიცხოვანი პროტესტი გამოიწვია.მშვიდობიანი საპროტესტო აქციის მონაწილეების თქმით, აღნიშნული ქმედებით პოლიცია ბრძოლას უცხადებდა საკლუბო ინდუსტრიას და ცდილობდა პოლიციული რეჟიმის დამყარებას. ომბუდსმენის თქმით, კითხვის ნიშნებს აჩენს ის ფაქტი, რომ დაკავებულ ნარკორეალიზატორთა უმრავლესობა, კლუბის გარეთ რამდენიმე საათით ადრე დააკავეს და გაურკვევეული იყო კლუბში სპეცრაზმის შესვლის რეალური მოტივი. აქცია, რომელიც ორი დღის განმავლობაში მიმდინარეობდა, ბოლოს აქციაზე შს მინისტრის მისვლით დასრულდა, გიორგი გახარიამ შეკრებილ საზოგადოებას თავისი და პოლიციის სახელით ბოდიში მოუხადა და პირობა დადო, რომ ყველაფერს გააკეთებდა იმის დასადგენად, რამდენად მართლზომიერი იყო 12 მაისს ჩატარებული სპეცოპერაცია.