„ჩვენ გვყავს ასეთი შემთხვევებისთვის გათვალისწინებული შავ პერანგიანები. ეს არის მომზადებული რაზმები“ - ნეონაცისტური ჯგუფის წევრები ,,თეთრი ხმაურის“ აქციას უპირისპირდებიან და აცხადებენ, რომ მათ ყვათ რაზმები, რომლებიც ნებისმიერ დაპირისპირებაში ჩართვას შეძლებენ.

ეს არის მომზადებული რაზმები, რომელსაც კანონის შესაბამისად შეუძლიათ ასეთ დაპირისპირებაში ჩართვა. ჩვენ ახლა ვინც არიან აქ მამაკაცები, ნამდვილი ქართველები, ვაჟკაცები წინაპრების ღირსეული გამაგრძელებლები ჩვენ ვიწყებთ ჩამოყალიბებას რაზმების და ჩვენ მზად ვართ დავიცვათ ჩვენი ქვეყანა. ნარკომოვაჭრეები და ლგბტ პროპაგანდისტები დღის წესრიგს საქართველოში ვერ წაიყვანენ. დღის წესრიგი გვეკუთვნის ჩვენ. სიკვდილი მტერს,“- განაცხადა „საქართველოს სამოქალაქო ერთობის“ ლიდერმა გიორგი ჭელიძემ.

დაჯგუფების წევრები ამბობენ, რომ ,,თეთრი ხმაურის“ აქციის წევრებმა 9 აპრილის მემორიალი შეურაცხყვეს და ამისათვის, მზად არიან მათ პასუხი გასცენ.

აქციის წევრების თქმით გარდა იმისა, რომ თეთრი ხმაური მხარს უჭერს ნარკორეალიზატორებს და ლგბტ საზოგადოებას, მათ შეურაცხყვეს 9 აპრილის მემორიალი.

„გახსოვთ კადრები, როცა გოგო ცეკვავს მემორიალზე და მთელი აქცია ამას ტაშს უკრავდა. ჩვენ გვინდა პასუხი გავცეთ ჩვენ ამ საქციელით. სანთლები გვინდა დავანთოთ,“-განაცხადა გიორგი გაბედავამ.

ნეონაცისტური ჯგუფის, „საქართველოს სამოქალაქო ერთობის“ და „ეროვნულ სოციალისტური მოძრაობის“ წევრებმა დღეს მსვლელობა დინამოს სტადიონის მიმდებარე ტერიტორიიდან დაიწყეს. ისინი რუსთაველის გამზირზე მიმდინარე საპროტესტო აქციაზე მისვლას გეგმავდნენ, თუმცა ჭანტურიას ქუჩაზე მათ პოლიციამ ამის შესაძლებლობა არ მისცა.

საბოლოოდ მათმა ერთმა ნაწილმა, გიორგი გაბედავასთან ერთად, რუსთაველის გამზირზე აქციის გამართვა მაინც შეძლო. ნაწილი კი ლონდონის პარკში იმყოფება.