„ქართული ოცნების“ პოლიტიკური საბჭოს ახლადარჩეულმა თავმჯდომარემ ბიძინა ივანიშვილმა დღეს გამართული ყრილობის ფარგლებში, პოლიტიკაში დაბრუნების მიზეზებზე ისაუბრა. ერთ-ერთ მიზეზად ოპოზიციური ძალები დაასახელა.

ივანიშვილის გამოსვლას აფასებს საქართველოს თავდაცვის ყოფილი მინისტრი დიმიტრი შაშკინი, რომელიც „ნიუპოსტთან“ საუბრისას აღნიშნავს, რომ ივანიშვილს ოპოზიციის სააკაშვილის გარშემო გაერთიანებისა და მიხეილ სააკაშვილის ქვეყანაში დაბრუნების ეშინია:

„რაზეც საუბრობს მოსახლეობა, ზუსტად იგივე გაიმეორა ბიძინა ივანიშვილმა, მისი ოფიციალური დაბრუნება უკავშირდება მთავარ ფაქტორს, ოპოზიციის გაძლიერებას. მან იგრძნო, რომ ოპოზიცია ერთიანდება, მან იგრძნო საფრთხე ოპოზიციის მხრიდან, ნახა, რომ ოპოზიცია ერთიანდება მიხეილ სააკაშვილის გარშემო, ეს მისთვის არის ყველაზე დიდი კოშმარი, რაც შეიძლება იყოს და მეორე, თვითონაც აღიარა, რომ „ქართულ ოცნებაში“ არის სერიოზული პრობლემები და ის ეცდება ამ პრობლემების მოგვარებას, მაგრამ ჩემი აზრით მთავარი ახლა არის ის, რომ პროცესი, რომელიც დაიწყო, ოპოზიციის გაერთიანების მიხეილ სააკაშვილის გარშემო, იყოს ბოლომდე მიყვანილი და ამას წინ ვერავინ და ვერაფერი დაუდგება. ძალიან მალე მიხეილ სააკაშვილი დაბრუნდება ქვეყანაში, ეს არის ივანიშვილის მთავარი შიში და მთავარი მოტივატორი“, - განაცხადა დიმიტრი შაშკინმა.