ბიძინა ივანიშვილი „ქართული ოცნების“ პოლიტიკური საბჭოს თავმჯდომარედ აირჩიეს. ყრილობის აღნიშნული ნაწილის შემდგომ, ივანიშვილი სიტყვით გამოვიდა და პოლიტიკაში დაბრუნების სამ მიზეზზე ისაუბრა, ერთ-ერთი მათგანი კი ოპოზიცია გახლავთ.

ივანიშვილის გამოსვლას პოლიტიკური პლატფორმა „ახალი საქართველოს“ ლიდერი გიორგი ვაშაძე „ნიუპოსტთან“ აფასებს:

„მე ვფიქრობ, რომ ძალიან სუსტი გამოსვლა იყო, როგორც ჩანს ნამდვილად აშინებს სიტუაცია. საზოგადოების განწყობას ხედავს, რომ ძალიან ნეგატიურია პერსონალურად მის მიმართ და "ქართული ოცნების" მიმართ და მას სერიოზული შიში აქვს, რომ ამ არჩევნებს წააგებს, საპრეზიდენტო არჩევნებს ვგულისხმობ წელს. შესაბამისად, აქედან გამომდინარე, ჩაერთვება საარჩევნო პროცესში. მაგრამ თუ საზოგადოების გამოხმაურებას სოციალურ ქსელში დავაკვირდებით, აბსოლუტურად ნეგატიურია მის გამოჩენაზე ამ შემთხვევაში და როგორც ჩანს არაფერი ახალი გზავნილი მას არ გაუკეთებია, რის გამოც შეიძლებოდა რამე პოზიტივი ყოფილიყო საზოგადოების მხრიდან.

ისევ და ისევ, არასწორი გზავნილია ოპოზიციაზე მისი საუბარი, გადაბრალებით ოპოზიციაზე, რომ ქვეყანაში ეკონომიკა არ ვითარდება, სამუშაო ადგილები არ იქმნება და გაჭირვება არის, თავის თავს აზიანებს ბიძინა ივანიშვილიც და ქართული ოცნებაც. ეს კიდევ ერთხელ აჩვენებს იმას, რომ განა იმის მცდელობა აქვთ, რომ რამე შეცვალონ ქვეყანაში და უკეთესობისკენ წავიდეს, უბრალოდ უნდა, რომ ამ განცხადებებით როგორმე თავიდან აირიდოს პასუხისმგებლობა, მაგრამ პასუხისმგებლობას ის ვერ გაექცევა. შემოქმედი იმ გაჭირვების, იმ პრობლემების რაც ქვეყანაში არის ბიძინა ივანიშვილი და ქართული ოცნებაა. კარგად ჩანს, რომ სწორედ ოპოზიციის აქტიურობამ გამოიყვანა ის ასპარეზზე, იმიტომ რომ უკიდურესად რთული მდგომარეობა აქვს“, - განაცხადა გიორგი ვაშაძემ.