"გარანტიას ვაძლევთ, მიუკერძოებლები ვიქნებით"- ძიუდოს ფედერაციაში არსებულ ვითარების შესასწავლად მინისტრი კომისიას ქმნის

პოლიტიკა - 12:26, 10 May, 2018

768

სპორტისა და კულტურის მინისტრი დაპირისპირებულ ძიუდოისტებს სთავაზობს, ფედერაციის ხელმძღვანელობის წინააღმდეგ არსებული პრეტენზიები სპეციალურმა კომისიამ შეისწავლოს, რომელშიც კულტურის სამინისტროს, პარლამენტის სპორტის კომიტეტისა და ოლიმპიური კომიტეტის წევრები გაერთიანდებიან. კომისიის წევრები ძიუდოს ფედერაციიდან გამოითხოვენ დეტალურ ინფორმაციას, რომელზეც ბოლო დღეებში იყო საუბარი.

მიხეილ გიორგაძე დაპირისპირებულ მხარეებს მოუწოდებს, თავი შეიკავონ კონფლიქტის ესკალაციისგან და პირობას დებს, რომ მიუკერძოებელი იქნება

„შევთანხმდით, რომ ერთობლივი კომისია ჩამოყალიბდა. კომისიის შემადგენლობაში სამინისტროს მხრიდან ვიქნები მე და ჩემი მოადგილეები, აგრეთვე მიხეილ ყაველაშვილი, შოთა ხაბარელი, ლერი ხაბელოვი, სპორტის კომიტეტისა და ოლიმპიური კომიტეტის წარმომადგენლები. იმ კომპეტენციიდან და პოლიტიკური პასუხისმგებლობიდან გამომდინარე, რომელიც ამ ინსტიტუციებს აქვთ, გადაწყვეტილება იქნება მიღებული. უახლოეს დღეებში მოხდება ამ საკითხების შესწავლა და შედეგებს, შესაბამის გადაწყვეტილებას, რომელიც კომისია მიიღებს, საზოგადოებას მივაწვდით. გადაწყვეტილებები მალე იქნება ცნობილი. სიტუაციის სიმწვავიდან გამომდინარე, ამ პროცესს არ გავაჭიანურებთ. მინდა ვთხოვოთ ყველას, რომ შევინარჩუნოთ თავი სამართლებრივ ჩარჩოებში, რომ არ მოხდეს სიტუაციის ხელოვნური ესკალაცია. ჩვენ გარანტიას ვაძლევთ ყველას, რომ ვიქნებით მიუკერძოებლები. “ - განაცხადა მინისტრმა.