ახალგაზრდული და კლუბური ცხოვრების დემონიზაციის მცდელობა დაუშვებელია

ახალგაზრდული და კლუბური ცხოვრების დემონიზაციის მცდელობა დაუშვებელია - დიმიტრი ცქიტიშვილი

პოლიტიკა - 16:55, 08 May, 2018

1501

საპარლამენტო უმრავლესობისა და ადამიანის უფლებათა დაცვის კომიტეტის წევრის, დიმიტრი ცქიტიშვილის თქმით საზოგადოების ერთ ნაწილში ახალგაზრდული და კლუბური ცხოვრების დემონიზაციის მცდელობაა, რაც დაუშვებელია, რადგან ახალგაზრდები და კლუბები ეს ის სოციალური გარემოა, სადაც ჩვენი საზოგადოების გათანამედროვება, გაევროპულება ხდება. აღნიშნულ თემაზე დიმიტრი ცქიტიშვილმა პირველი არხის გადაცემაში „აქტუალური თემა მაკა ცინცაძესთან ერთად“ ისაუბრა.

„საზოგადოების ერთ ნაწილში ახალგაზრდული და კლუბური ცხოვრების დემონიზაციის მცდელობაა, რაც დაუშვებელია, რადგან ახალგაზრდები და კლუბები ეს ის სოციალური გარემოა, სადაც ჩვენი საზოგადოების გათანამედროვება, გაევროპულება ხდება და მიუხედავად იმისა, რომ შესაძლოა, გარკვეული შემთხვევები კლუბებში, ახალგაზრდულ წრეებში ხდებოდეს, არ უნდა დავუშვათ ის, რომ კლუბები ამის სათავედ განვიხილოთ.

ეს საკითხები ცალსახად უნდა გავმიჯნოთ და მათ ძალიან ჯანსაღად, ობიექტურად უნდა შევხედოთ. კლუბის მეპატრონეები ძალიან ცდილობენ, ქვეყნის გათანამედროვებას და პროგრესს ხელი შეუწყონ და მათი ასეთ საკითხებში დადანაშაულება არანაირად არ შეიძლება ისევე, როგორც არ შეიძლება სახელმწიფოს დადანაშაულება რამდენიმე დღის წინ მომხდარ კონკრეტულ ფაქტში, რადგან ეს არის გარემოებები, რომლებიც ცალკეულ შემთხვევებში ყოველთვის მოხდება, რადგან სამწუხაროდ, ნარკოტიკის მომხმარებელი რისკის ზონაში თავად შედის და ხშირ შემთხვევაში, სახელმწიფო უძლური იქნება.

ხშირ შემთხვევაში შესაძლოა, სახელმწიფო უძლური აღმოჩნდეს, მაგრამ მაქსიმალურად უნდა მოვახდინოთ პრევენცია, რომ რაც შეიძლება, ნაკლები ნარკოდამოკიდებული იყოს და გვქონდეს მექანიზმი, ასეთ შემთხვევაში ნარკოდამოკიდებული როგორ გამოვიყვანოთ იმ მდგომარეობიდან, რაშიც შესაძლოა, ის აღმოჩნდეს.“- განაცხადა ცქიტიშვილმა.

საპარლამენტო უმრავლესობის წევრმა ასევე აღნიშნა, რომ ქვეყანაში ნარკოპოლიტიკა მნიშვნელოვნად უნდა შეიცვალოს.

„ერთი მხრივ, ნარკორეალიზატორების მიმართ ზომები ძალიან უნდა გავამკაცროთ და მეორე მხრივ, სახელმწიფოს პოლიტიკა მომხმარებლებზე ზრუნვისკენ, ჯანსაღი ცხოვრების წესის დამკვიდრებისკენ უნდა იყოს მიმართული“, – განაცხადა ცქიტიშვილმა.

მისი თქმით, ნარკოპოლიტიკის შეცვლა მხოლოდ ნარკორეალიზატორებთან ბრძოლას არ გულისხმობს და ეს კომპლექსურ ღონისძიებათა გეგმაა, როდესაც ყველა სტრუქტურის მუშაობა სინქრონული იქნება.