პუტინმა 9 მაისი ყოფილი CCCP-ის ქვეყნების ლიდერებს მიულოცა, გამონაკლისი საქართველო და უკრაინაა

პოლიტიკა - 14:43, 08 May, 2018

4493

რუსეთის მეოთხედ არჩეული პრეზიდენტი ვლადიმირ პუტინი მეორე მსოფლიო ომის 73-ე წლისთავს ყოფილი საბჭოთა კავშირის ქვეყნებს ულოცავს. პუტინმა მიულოცა სომხეთის, ბელორუსის, ყაზახეთის, ყირგიზეთის, მოლდავის, ტაჯიკეთის, თურქმენეთის, უზბეკეთის ლიდერებს, არ გამორჩა არც რუსეთის მიერ ოკუპირებული აფხაზეთისა და ცხიმვალის რეგიონის საოკუპაციო რეჟიმის ე.წ ლიდერები. რაც შეეხება უკრაინას და საქართველოს, პუტინმა 9 მაისი მხოლოდ ხალხს მიულოცა და არა ხელისუფლებას.

როგორც კრემლის მიერ გამოქვეყნებულ ინფორმაციაშია ნათქვამი, მილოცვისას რუსეთის პრეზიდენტმა ხაზი გაუსვა იმას, რომ ფაშიზმზე გამარჯვების დღე- წმინდა დღეა და ამ ხალხების ერთიანობის და უპრეცედენტო გმირობის სიმბოლოა.

„პუტინის თქმით, უმნიშვნელოვანესია, რომ ახალგაზრდებს, მეორე მსოფლიო ომის შესახებ სიმართლე იცოდნენ და განაცხადა, რომ წარსულის ტრაგიკული მოვლენების აწმყოში გამეორება თავიდან უნდა იქნეს აცილებული.

პუტინმა გამოთქვა რწმენა, რომ ძმური მეგობრობის და ურთიერთდახმარების ტრადიცია, რომელიც მძიმე გამოცდებმა გაამყარა, ამ ქვეყნებს შორის ურთიერთობის განვითარების საიმედო საფუძვლად დარჩება“- ნათქვამია კრემლის მიერ გამოქვეყნებულ ინფორმაციაში.