"ტატუნაშვილის მკვლელობა აჩვენებს, რომ ვითარება არ არის გაყინული, რაც ქმნის ყოველდღიურ გამოწვევებს"

"ტატუნაშვილის მკვლელობა აჩვენებს, რომ ვითარება არ არის გაყინული, რაც ქმნის ყოველდღიურ გამოწვევებს" - ქეთევან ციხელაშვილი

პოლიტიკა - 10:47, 08 May, 2018

1383

შერიგებისა და სამოქალაქო თანასწორობის საკითხებში საქართველოს სახელმწიფო მინისტრი ქეთევან ციხელაშვილი საქართველოში ვიზიტით მყოფი ევროპარლამენტის უსაფრთხოებისა და თავდაცვის ქვეკომიტეტის ჯგუფის წევრებთან არჩილ ტატუნაშვილის სიცოცხლის ხელყოფის საკითხს განიხილავს.

ამასთან, მინისტრის განცხადებით, საუბარი შეეხება ახალ სამშვიდობო ინიციატივებს, რომელიც პარლამენტის სესიაზე დამტკიცდა.

„სამშვიდობო ინიციატივებს, რომელიც პარლამენტმა დაამტკიცა, უკვე აქვს ევროკავშირის ძალიან მნიშვნელოვანი მხარდაჭერა. ევროპარლამენტი მუშაობს, რომ მალე იქნას მიღებული სპეციალური რეზოლუცია საქართველოზე, კონფლიქტზე, არსებულ სიტუაციაზე, იმ მხარდაჭერაზე, რომელსაც ევროკავშირი გვიცხადებს კონფლიქტის მშვიდობიანი გადაჭრის საკითხებში. ამ ვიზიტის ფარგლებში დაგეგმილია არაერთი მნიშვნელოვანი შეხვედრა. ევროპარლამენტარები თავად აპირებენ, მოინახულონ ასევე ზუგდიდის მიმართულებით ხელოვნური გამყოფი ხაზი. ასეთი ინფორმირებით იქნება შესაძლებელი, რომ რეზოლუციაში ობიექტურად აისახოს არსებული მდგომარეობა... როდესაც ჩვენ ვსაუბრობთ შექმნილ ვითარებაზე და მთელს ამ სიმძიმეზე, სამწუხაროდ და საუბედუროდ, ეს სიმძიმე გამოვლინდა ყველაზე ტრაგიკულად სწორედ მაშინ, როდესაც მოხდა ტატუნაშვილის დაკავება უკანონოდ, მისი სიცოცხლის ხელყოფა, 26 დღის განმავლობაში ცხედრის გადმოსვენების გაჭიანურება. ეს არის ზუსტად ყველაზე უარესი, რაც შეიძლება მოხდეს და რაც აჩვენებს, რომ ვითარება არ არის გაყინული, არ არის სტატიკური. ეს ქმნის ყოველდღიურ გამოწვევებს ადამიანებისთვის. მათი სიცოცხლისთვის, უსაფრთხოებისთვის“, - განაცხადა ციხელაშვილმა.