კორუფციული სქემა უფასო სასადილოებში - ,,მივმართავთ თბილისის მერს, დაუყოვნებლივ გათავისუფლდეს ყველა მაღალი თანამდებობის პირი“

პოლიტიკა - 12:32, 07 May, 2018

1085

გიორგი ვაშაძე კალაძე მიმართავს და ე.წ. სასადილოების კორუფციულ სქემაში მხილებული ყველა მაღალი თანამდებობის პირის დაუყოვნებლივ გათავისუფლებას ითხოვს.

„ახალი საქართველოს“ ოფისში დღეს ბრიფინგი გაიმართა. პარტიის ლიდერმა, გიორგი ვაშაძემ და სოციალური მიმართულების ხელმძღვანელმა, თეონა ჭალიძემ ე.წ. უფასო სასადილოების კორუფციულ სქემასთან დაკავშირებით, მერიის შიდა აუდიტის მონიტორინგის შედეგები გაასაჯაროვეს. მათი თქმით, დასკვნაში დასტურდება ყველა ის კანონდარღვევა, რომელზეც პარტიის წარმომადგნლებმა ერთი წლის წინ საჯაროდ ისაუბრეს.

„ხელთ მაქვს დასკვნა, რომელიც მომზადებულია მერიის შიდა აუდიტის სამსახურის მიერ. დასკვნაში სრულად დასტურდება უფასო სასადილოებში არსებული სისტემური კორუფციის ფაქტები, რომელზეც ჩვენ 1 წლის წინ ვსაუბრობდით. ეს არის უპრეცენდენტო, მასშტაბური და სისტემური კორუფციის ფაქტი, რომელიც კიდევ ერთხელ დაადასტურა მერიის შიდა აუდიტის სამსახურმა. ფაქტი იმდენად ცალსახა და ნათელია, რომ მათაც ვერ შეძლეს ამ კორუფციულ სქემაზე ხელის დაფარება.

ჩვენ დღეს მოვითხოვთ ქალაქ თბილისის მერისგან, დაუყოვნებლივ გაათავისუფლოს დაკავებული თანამდებობიდან გელა ჩივიაშივილი და სოციალური სამსახურის ყველა მაღალი თანამდებობის პირი.

პროკურატურას მივმართავ - დროა დაიწყოთ კორუფციის წინააღმდეგ ბროძოლა, რადგან ამაზე რეაგირების არ ქონდა, არის დანაშუალისთვის ხელის დაფარება. მოვითხოვთ სისხლის სამართლის პასუხისგებაში მიეცნენ ადამიანები, რომლებიც ყველაზე გაჭირვებული ფენისთვის განკუთვნილ, მილიონობით ლარს ითვისებენ“-განაცხადა გიორგი ვაშაძემ.

კონკრეტულ ფაქტებზე, რაც მერიის შიდა აუდიტის სამსახურის დასკვნაშია მოყვანილი, „ახალი საქართველოს“ სოციალური მიმართულების ხელმძღვანელმა, თეონა ჭალიძემ ისაუბრა.

„დადასტურდა, რომ გამგეობის თანამშრომლები, არ ახორციელებენ სრულყოფილ მონიტორინგს, რაზეც ,,ახალი საქართველოს" სოციალურმა სამსახურმა თითქმის ერთი წლის წინ აცნობა მერს და პროკურატურას. ასევე, ის, რომ ბენეფიციართა 18% პურის გარდა, სხვა ულუფა საერთოდ არ მიაქვს შინ და აღნიშნული არსად აღირიცხება. დასკვნაში დადასტურებულია ის, რომ ბაზაში ფიქსირდებოდნენ ე.წ ,,მკვდარი სულებიც“ და რიგ შემთხვევებში ბენეფიციარების ნაცვლად ხელს აწერდნენ სხვები. დადასტურდა, ასევე ის, რომ კონტრაქტორი კომპანიები იმ რაოდენობის საჭმელს არ ამზადებდნენ, რაც სატენდერო პირობებით ევალებოდათ, თუმცა ანაზღაურებას იღებდნენ სრულად. დადასტურდა, რომ ძირითადი სიის ბენეფიციარების 11% და დამატებითი სიის ბენეფიციარების 13% არ დადის სასადილოში. ეს არ არის ყველაფერი, ჩვენ ამ დარღვევებზე, ერთი წლის წინ ვსაუბრობდით. კანონდარღვევების შესახებ ვაცნობეთ, თბილისის მერიას, მთავარ პროკურატურას და აუდიტის სამსახურს.“- განაცხადა თეონა ჭალიძემ