სესხის გაცემის შეზღუდვები სწრაფ და ონლაინ სესხებზეც გავრცელდება

სესხის გაცემის შეზღუდვები სწრაფ და ონლაინ სესხებზეც გავრცელდება - მამუკა ბახტაძე

პოლიტიკა - 12:00, 07 May, 2018

2551

საქართველოს ფინანსთა მინისტრის განცხადებით, კომერციული ბანკებისთვის დაწესებული რეგულაციები, რომლებიც სესხის გაცემაზე მოქალაქეებისთვის გარკვეულ შეზღუდვას ითვალისწინებს, სწრაფ და ონლაინსესხებზეც გავრცელდება, ამის შესახებ მამუკა ბახტაძემ ფეისბუქლაივის დროს განაცხადა. მისი თქმით, ჭარბვალიანობის პრობლემის გამომწვევი სწორედ სწრაფი და ონლაინსესხების მიერ შექმნილი მომსახურებები იყო:

„მინდა შევეხო თემას, რომელიც ეხება სწრაფ და ონლაინსესხებს. საერთო თამაშის წესებზე როდესაც ვსაუბრობთ, ბუნებრივია, იგულისხმება მთელი ფინანსური სექტორი. ვინაიდან, პრობლემის მნიშვნელოვანი მიზეზი იყო ე.წ. ასიმეტრიული რეგულაცია ფინანსური სექტორის სხვადასხვა წარმომადგენელს შორის, ანუ საბანკო, არასაბანკო სექტორს, მიკროსაფინანსოებს თავის რეგულაცია ჰქონდათ, ონლაინსესხებზე სხვა რეგულაცია ვრცელდებოდა, საბოლოო ჯამში, ეს ყველაფერი არ იყო ერთიან რეგულაციაში მოხვედრილი და ეს იქცა პრობლემის ერთ-ერთ წყაროდ. აქედან გამომდინარე, თამაშის წესები შეეხება ყველას, მათ შორის, რა თქმა უნდა, სწრაფი და ონლაინსესხების წარმომადგენლებსაც. ვინაიდან, სწორედ ამ მიმართულების მიერ შექმნილმა ასეთი ტიპის მომსახურებებმა შექმნა ჭარბვალიანობის პრობლემა.“- განაცხადა მამუკა ბახტაძემ.

ეროვნული ბანკის რეგულაციები სესხის გაცემასთან დაკავშირებით ძალაში დღეიდან შედის, რომლის მიხედვითაც კომერციულ ბანკებს კლიენტის გადახდისუნარიანობის, მისი შემოსავლებისა და ხარჯების დეტალური ანალიზის გარეშე, სესხის გაცემა ეკრძალებათ. კერძოდ, ასეთი სესხების საერთო თანხა არ უნდა აღემატებოდეს კომერციული ბანკის საზედამხედველო კაპიტალის 25%-ს.