"კრახი და კატასტროფა რაც პოლიციას დაემართა, ამაზე აღარ უნდა დავსვათ კითხვა?"- პრეზიდენტი ბარნოვზე მომხდარ მკვლელობაზე

პოლიტიკა - 21:06, 03 May, 2018

2018

საქართველოს პრეზიდენტი გადაცემა „რეაქციაში“ ბარნოვის ქუჩაზე მომხდარ ტრაგედიას გამოეხმაურა. გიორგი მარგველაშვილის თქმით, ქვეყანა პროპაგანდისტულ რეალობაში ცხოვრობს და არსებითი პრობლემის დანახვის და ფემიციდთან ბრძოლის ნაცვლად, თავზე ახვევენ პროპაგანდას, რომ პრეზიდენტის მიერ შეწყალებული პირის მიერ მკვლელობის ჩადენა პრეზიდენტის ბრალია და კითხვა არ ისმის პოლიციის მიმართ, რომელსაც მკვლელობამდე 2 საათით ადრე ძალადობის მსხვერპლმა ქალმა დახმარებისთვის მიმართა:

„მე მინდა ვთქვა სირთულეზე პროპაგანდის მიმართულებით და ამას არაერთხელ გავუსვამ ხაზს. ჩვენ ზუსტად ორი კვირის წინ, როდესაც მოხდა ბარნოვის ქუჩის ტრაგედია, ერთი კვირა მთელი მედია და ინტერეს ჯგუფები მაბრალებდნენ ამ ტრაგედიას მე. მე რომ პიროვნულად ძალიან მძიმედ გადავიტანე, გასაგებია, მე დავსვი კითხვა, ის კრახი, რომ ქალი მივიდა პოლიციაში, უთხრა რომ მოკვლას უპირებდნენ და 2 საათში მოკლეს. ეს კრახი და კატასტროფა რაც პოლიციას დაემართა, ამაზე აღარ უნდა დავსვათ კითხვა, ამაზე კითხვა არ დასმულა. ჩვენ შევედით ისეთ პროპაგანდისტულ ვითარებაში, რომ არ გვადარდებს, იმ პოლიციის განყოფილებაში დღეს ისევ შეიძლება მივიდეს ქალი, თქვას მომკლავენო და მოკლან და დაბრალდეს მერე პრეზიდენტს, ამ პროპაგანდისტულ რეალობაში ცხოვრება ჩემთვის როგორც მოქალაქისთვის კი არაა პრობლემა, საზოგადოებისთვისაა პრობლემა.“- განაცხადა მარგველაშვილმა.