„გუშინდელმა გამოსვლამ ჩვენ დაგვანახა, რომ არ ვართ სახელმწიფო და არ გვყავს პრეზიდენტი“. - ასე გამოეხმაურა „დემოკრატიული მოძრაობის“ ლიდერი ნინო ბურჯანაძე პრეზიდენტ გიორგი მარგველაშვილის ბოლო საპარლამენტო მოხსენებას.

„ეს არ იყო პრეზიდენტის ანგარიში, ეს იყო მხოლოდ ვითარების მიმოხილვა. შეიძლება გამოიყოს რამოდენიმე სწორი შენიშვნა, რაც პრეზიდენტმა თავის 20 წუთიან მოხსენებაში გააჟღერა, მაგრამ მას არ ჰქონია მცდელობა დაესახელებინა იმ პრობლემების მიზეზები, რომელშიც ქვეყანა იმყოფება. გიორგი მარგველაშვილს ამის გამბედაობა არ ეყო.

გუშინ მე დავინახე შეშინებული პრეზიდენტი და მონების პარლამენტი. პრეზიდენტი პროტესტის ნიშნად პარლამენტს ტოვებდეს, ეს არც ამ ქვეყანაში მინახავს და არც სხვა ქვეყანაში. ყველაფერს თავი, რომ დავანებოთ, პარლამენტში მიწვეული იყო დიპლომატიური კორპუსის წარმომადგენლები და საზოგადოება ელოდებოდა პრეზიდენტის მოხსენებას, რას იტყოდა ის, როგორ უპასუხებდა მის მიმართ გამოთქმულ ბრალდებებს და რა ვიხილეთ? გაქცეული პრეზიდენტი. ეს იყო როგორც პრეზიდენტის, პარლამენტის და დიპლომატიური კორპუსის ინსტიტუტების შეურაცხჰყოფა, ასევე ასევე საზოგადოების უპატივცემლობა.

რაც შეეხება რეგლამენტს, მე მაინტერესებს, გიორგი მარგველაშვილის ნაცვლად იქ რომ ყოფილიყო ბიძინა ივანიშვილი, ვინმეს რეგლამენტი გაახსენდებოდა?! ვინმე გაბედავდა ივანიშვილისთვის იმის შეხსენებას, რომ რეგლამენტი საერთოდ არსებობს? რა თქმა უნდა არა!

ამიტომ, რა თქმა უნდა პრეზიდენტს შეეძლო თავის დასკვით სიტყვაში ეპასუხა ყველა შეკითხვაზე, არა მანამდე, რადგან ეს არ იყო კითხვა-პასუხის საღამო, მაგრამ არც იმით დაშავდებოდა რამე რომ უმრავლესობას პრეზიდენტის თხოვნა დაეკმაყოფილებინა. ამაზე ბევრად მნიშვნელოვანი კანონი და მუხლები დაურვევია უმრავლესობას, როცა მათ ეს სჭირდებოდათ. რაზე ვსაუბრობთ საერთოდ? კონსტიტუცია გადაგვახიეს თავზე. მონების პარლამენტი გვაქვს და მონების ქვეყანად გადავიქცევით და მონა, როგორც წესი, ძალიან მაგარია იმასთან, ვიზეც მისი პატრონი გაბრაზებულია“.- აცხადებს ნინო ბურჯანაძე.