საქართველოს პარლამენტში პრეზიდენტი გიორგი მარგველაშვილი მოხსენებით წარსდგა. ამ წუთებში დეპუტატები სიტყვით გამოდიან და პრეზიდენტის გამოსვლას აფასებენ, იწყება კითხვა-პასუხის რეჟიმი.

ფრაქცია „ქართული ოცნების“ თავმჯდომარემ მამუკა მდინარაძემ აქცენტი გააკეთა მარგველაშვილის გამოსვლის იმ ნაწილზე, სადაც პრეზიდენტმა „გირგვლიანის შესწორებებზე“ ისაუბრა:

„თქვენ ისაუბრეთ გირგვლიანის შესწორებებზე და თქვით, რომ ეს არის კარგი, მაგრამ ეს პროცესი ბოლომდე არ მივიდა, ეს პროცესი მიმდინარეობს და უდაოდ პოზიტიური პროცესია, ძალიან სამწუხაროა ამ ფონზე, რომ თქვენი და გირგვლიანის საქმეში ბრალდებული ექსპრეზიდენტის მიხეილ სააკაშვილის ლოგიკა აბსოლუტურად ერთიერთში დაემთხვა ერთმანეთს. წარმოუდგენელი ამბავი იყო, როდესაც თქვენ სცადეთ ამ საქმესთან დაკავშირებით პრეზიდენტ სააკაშვილის გამართლება და მას პოლიტიკური ნიშნით დევნილი უწოდეთ. უფრო მეტიც, თქვენი წინამორბედისგან 9 მილიონამდე თანხის დანაშაულებრივ ხარჯვას, მისივე მესიჯბოქსის კვალდაკვალ უწოდეთ პიჯაკების საქმე.

სწორედ ასეთი წარმოდგენების შექმნის ფონზე იყო რომ ჩვენს მიერ დაანონსდა გირგვლიანის შესწორებები, რომელიც თავისმხრივ ითვალისწინებს პრევენციას, რომ საქართველოში ვერც ერთმა პოლიტიკური თანამდებობის პირმა ვეღარ შეძლოს თავისი უფლებამოსილების დანაშაულებრივად გამოყენება, დანაშაულებრივი ბრძანების გაცემა, მართლმსაჯულებისათვის ხელის შეშლა. ამასთან დაკავშირებით თქვენ სცადეთ აქცენტი გადაგეტანათ სხვა მიმართულებით და ყურადღება პერსონალიებზე გაგემახვილებინათ. საუბრობდით წმენდაზე, მოშორებაზე კონკრეტული პიროვნებების და არა უშუალოდ შესწორებებზე“, - განაცხადა მამუკა მდინარაძემ.