„იგნორირებისა და ინსტიტუტების შესუსტების პოლიტიკა ასუსტებს ქვეყანას“

„იგნორირებისა და ინსტიტუტების შესუსტების პოლიტიკა ასუსტებს ქვეყანას“ - პრეზიდენტი

პოლიტიკა - 13:07, 02 May, 2018

745

საქართველოს პრეზიდენტის, გიორგი მარგველაშვილის თქმით, იგნორირების პოლიტიკა ქვეყანას ასუსტებს.

როგორც მარგველაშვილმა პარლამენტში, რიგით მეხუთე ანგარიშის წარდგენისას განაცხადა, ძირითადმა ინიციატივებმა შეასუსტა ქვეყნის დემოკრატია და ინსტიტუტები.

„გაგახსენებთ სულ ახლახანს დაყენებულ რამდენიმე ინიციატივას: ეს არის შეერთებულ შტატებთან საგანგებო წარმომადგენლის ინიციატივა; ეს არის საქართველოს მხარდამჭერი აქტის ინიცირება, რომელიც ჩემი მხრიდან მოდიოდა. ეს ის საკითხებია, რომლებშიც უკრაინელები ჩვენზე წინ არიან რუსეთთან მიმართებაში და თავის საგარეო პოლიტიკის თვალსაზრისით.

რატომ უნდა ხდებოდეს ასეთი ინიციატივებისთვის ზურგის შექცევა და იგნორირება? საერთოდ, იგნორირებისა და ინსტიტუტების შესუსტების პოლიტიკა, ჩემი აზრით, კონკრეტულ პოლიტიკოსებს კი არ ასუსტებს, ასუსტებს ქვეყანას.

ის პროცესები, რასთან მიმართებაშიც მე არაერთხელ მქონდა ამ პარლამენტში გამოსვლაც და ინიცირებაც, იყო მიმართული იქითკენ, რომ დაგვეცვა სახელმწიფო ინსტიტუტები, ეროვნული ბანკი, სასამართლო, პრეზიდენტის ინსტიტუტი. რა მიზანი შეიძლება ჰქონდეს ინსტიტუტების შესუსტებას ქვეყნისთვის? ამ თვალსაზრისით თუ გადავავლებთ თვალს, რა გაკეთდა 2017 წელს კოსტიტუციის ცვლილებაში, ჩვენ დავინახავთ, რომ ძირითადმა ინიციატივებმა სწორედ რომ შეასუსტა ქვეყნის დემოკრატიაც და ინსტიტუტებიც“- აღნიშნა მარგველაშვილმა.