საქართველოს პრეზიდენტმა გიორგი მარგველაშვილმა პარლამენტში გამოსვლისას რუსულ საფრთხეებზე ისაუბრა და ამ კონტექსტში განაცხადა, რომ გაუგებარი იყო უშიშროების საბჭოს გაუქმება.

„როდესაც ვახასიათებთ საგარეო პოლიტიკურ ვითარებას, ბუნებრივია, მთავარ ფაქტორს უნდა მივაქციოთ ყურადღება და ეს არის რუსეთის ფედერაცია, ამ მიმართულებით არაერთხელ აღმინიშნავს, რომ ჩვენ დიპლომატიას ნამდვილად წარმატება აქვს მიღწეული და ის არააღიარების პოლიტიკა რუსეთს ფაქტიურად ჩაუვარდა და მსოფლიო თანამეგობრობამ ნათლად შეაქცია ზურგი იმ უსამართლობას, რომლის გატანასაც და გაყიდვასაც რუსეთი ცდილობდა აფხაზეთისა და ოსეთის აღიარების მცდელობით.

მთლიანობაში მინდა ვთქვა, რომ ის პოლიტიკა, რომელიც განსაზღვრული იყო და არის რუსეთის მიმართ და რომელიც მდგომარეობს სტრატეგიული მოთმინების პოლიტიკაში, არის სწორი და ადეკვატური, ერთ-ერთი მთავარი მიზანი არის, რომ ჩვენ არ წამოვეგოთ პროვოკაციას და არ მივცეთ რუსეთს საშუალება, რომელიც თავისი განვითარების აგრესიულ ფაზაში იმყოფება ამ ეტაპზე, გამოაჩინოს ძალა ჩვენს ქვეყანასთან მიმართებაში. ეს კიდევ უფრო აქტუალურია იმ ახალ ფაზაში, რომელშიც ფაქტიურად მთელი მსოფლიო შედის რუსეთთან ურთიერთობის თვალსაზრისით, 2018 წელი შეიძლება ითქვას, რომ რუსეთის მხრიდან შეიძლება იყოს განსაზღვრული, როგორც ცივი ომის იმიტაციის, ცივი ომის შექმნის მცდელობა. ცივი ომის სპეციფიკა და პრობლემა იმაში მდგომარეობს, რომ ცივი ომის დროს მესამე ქვეყნებში იარაღის ჟღარუნი განახორციელოს ქვეყანამ, ამიტომ, ჩვენ დღეს განსაკუთრებით გვჭირდება ამ მიმართულებით ფხიზლად ყოფნა და მე მიმაჩნია, რომ სწორია სტრატეგიული მოთმინების პოლიტიკა, მაგრამ ამ ახალ ფაზაში, ჩემი აზრით, კიდევ უფრო ძლიერი უნდა იყოს მოტივაცია ჩვენი გაერთიანებისა, ყველასი, პოლიტიკური კუთვნილების გარეშე იმ ღირებულებების ირგვლივ, რასაც ჰქვია ჩვენი სამშობლოს მთლიანობის, ერთიანობის დაცვა.

ამ ფონზე ჩემთვის ნამდვილად გაუგებარია ის პოლიტიკა, რომელიც ხორციელდებოდა პრეზიდენტის ინსტიტუტთან მიმართებაში, რუსეთთან ამ ვითარებაში მყოფი ქვეყანა აუქმებს უმაღლეს პოლიტიკურ ორგანოს, რომლითაც უნდა მიმდინარეობდეს მსჯელობა ქვეყნის თავდაცვიუნარიანობაზე, აუქმებს უშიშროების საბჭოს, ყველა პოლიტიკურ კონტექსტს რომ თავი დავანებოთ, თვითგადარჩენის ინსტიქტის ტოლფასია, რომ ასეთი ინსტიტუტეტბი არ გავაუქმოთ და ამ თემებზე მაინც გვქონდეს ერთიანი პოზიცია“, - განაცხადა გიორგი მარგველაშილმა.